കണ്ണാടിപ്പറമ്പ:- നിടുവാട്ട് മഹല്ല് ജുമാമസ്ജിദിലെ ആണ്ടുനേർച്ചയോടനുബന്ധിച്ച് കണ്ണാടിപ്പറമ്പ ശ്രീധർമ്മശാസ്താ ക്ഷേത്രം ഭാരവാഹികൾ അരി സമർപ്പണം നടത്തി. എല്ലാ വർഷവും ക്ഷേത്രത്തിലെ ഉത്ര വിളക്കുത്സവത്തിന് പള്ളി കമ്മിറ്റി പഞ്ചസാര കുടം സമർപ്പിക്കാറുണ്ട്. ഇതിന്റെ ഭാഗമായാണ് ക്ഷേത്രം ഭാരവാഹികൾ വർഷംതോറും നിടുവാട്ട് പള്ളിയിലേക്ക് അരി സമർപ്പണം നടത്തുന്നത്.മാർച്ച് 17 മുതൽ 25 വരെ ഉള്ള ഉത്ര വിളക്കുത്സവത്തിന് കൊടിയേറ്റ ദിനത്തിൽ പള്ളികമ്മിറ്റി ഭാരവാഹികൾ പഞ്ചസാര കുടം ക്ഷേത്രത്തിൽ സമർപ്പിക്കും.
ഇന്നു വൈകീട്ടോടെ നിടുവാട്ട് പള്ളിയിലെത്തിയ ക്ഷേത്ര ഭാരവാഹികളെ ലത്തീഫ് മാസ്റ്റർ, കെ.ടി മൂസാൻ ഹാജി, സി.പി മായിൻ മാസ്റ്റർ, മുല്ലപ്പള്ളി മുഹമ്മദ്, ടി.പി അമീൻ, ഒ.പി മൂസാൻ ഹാജി, കെ.ടി ഖാലിദ് ഹാജി, പള്ളിക്കപ്പുര മുഹമ്മദ് തുടങ്ങിയവർ ചേർന്ന് സ്വീകരിച്ചു. ഇളനീരും മധുരപലഹാരങ്ങളും കഴിച്ച ക്ഷേത്ര ഭാരവാഹികൾ തങ്ങൾക്കു നൽകിയ സ്വീകരണത്തിന് നന്ദിയറിയിച്ചു. തുടർന്ന്, SIM അങ്കണത്തിൽ നടന്ന സ്നേഹസംഗമത്തിൽ ലത്തീഫ് മാസ്റ്റർ, മഹല്ല് പ്രസിഡൻ്റ് കെ.ടി മൂസാൻ ഹാജി, സെക്രട്ടറി സി.പി മായിൻ മാസ്റ്റർ, കെ.എൻ മുസ്തഫ, ക്ഷേത്രം ട്രസ്റ്റി ബോർഡ് ചെയർമാൻ എൻ.രാധ കൃഷണൻ, ഉത്ര വിളക്ക് ആഘോഷകമ്മിറ്റിപ്രസിഡൻ്റ് പി.പി രാജീവൻ, സെക്രട്ടറി പി.രഘുനാഥൻ, എ.വി നാരായണൻ,എൻ.വി. ലതീഷ് തുടങ്ങിയവർ സംസാരിച്ചു.
