തിരൂർ: - കോവിഡ് വ്യാപനത്തിന്റെ പശ്ചാത്തലത്തിൽ തിരൂർ തുഞ്ചൻപറമ്പിൽ ഇക്കുറി കുട്ടികളെ എഴുത്തിനിരുത്തില്ല. നവരാത്രി ആഘോഷങ്ങളുടെ ഭാഗമായി നടത്തിവരാറുള്ള തുഞ്ചൻ വിദ്യാരംഭം കലോത്സവവും ഉണ്ടാവില്ല.
മലപ്പുറം ജില്ലയിൽ രോഗവ്യാപനം രൂക്ഷമായതിനാലും സംസ്ഥാനത്ത് നിരോധനാജ്ഞ നിലവിലുള്ളതിനാലുമാണ് ഇത്തരമൊരു തീരുമാനമെന്ന് തുഞ്ചൻ സ്മാരക ട്രസ്റ്റ് ചെയർമാൻ എം.ടി. വാസുദേവൻനായരും സെക്രട്ടറി പി. നന്ദകുമാറും അറിയിച്ചു.
തുഞ്ചൻപറമ്പിൽ വിദ്യാരംഭം നടക്കാത്ത സാഹചര്യത്തിൽ ഇത്തവണ ഓൺലൈൻ രജിസ്ട്രേഷൻ ഏർപ്പെടുത്താൻ തീരുമാനിച്ചിട്ടുണ്ട്. രജിസ്റ്റർ ചെയ്യുന്ന കുട്ടികൾക്ക് എം.ടി. വാസുദേവൻനായരുടെ അനുഗ്രഹ ഭാഷണത്തിന്റെ ലിങ്ക് വിദ്യാരംഭദിവസം രാവിലെ നൽകും.
കുട്ടികൾക്ക് വീടുകളിൽ വിദ്യാരംഭം നടത്താവുന്നതാണ്. ഒപ്പം സാക്ഷ്യപത്രവും അക്ഷരമാല കാർഡും ഹരിനാമകീർത്തനവും തപാലിൽ അയച്ചുകൊടുക്കും.
ദുർഗ്ഗാഷ്ടമി, മഹാനവമി, വിജയദശമി ദിവസങ്ങളിൽ കോവിഡ് പ്രോട്ടോക്കോൾ കർശനമായി പാലിച്ചുകൊണ്ട് മാത്രമേ തുഞ്ചൻ പറമ്പിൽ പ്രവേശനം അനുവദിക്കൂ.
നിരോധനാജ്ഞയുടെ പശ്ചാത്തലത്തിൽ ഒരേസമയം അഞ്ചുപേരിൽ കൂടുതൽ പ്രവേശിപ്പിക്കില്ല. ഒക്ടോബർ 31 വരെ തുഞ്ചൻപറമ്പിൽ പതിവു വിദ്യാരംഭം ചടങ്ങളുകളും ഉണ്ടാവില്ലെന്ന് ഭാരവാഹികൾ അറിയിച്ചു. കൂടുതൽ വിവരങ്ങൾക്ക് 0494 2422213, 2429666.
