തിരുവനന്തപുരം:- രഞ്ജി ട്രോഫി ക്രിക്കറ്റ് ടൂർണമെന്റിനുള്ള കേരള ടീമിനെ പ്രഖ്യാപിച്ചു. ഇത്തവണയും സച്ചിൻ ബേബി ടീമിനെ നയിക്കും. വിഷ്ണു വിനോദ് ആണ് പുതിയ വൈസ് ക്യാപ്റ്റൻ. മുൻ ഇന്ത്യൻ താരം എസ് ശ്രീശാന്ത് ടീമിൽ ഇടം നേടി.
അതേസമയം സഞ്ജു സാംസണെ തത്ക്കാലം ടീമിൽ ഉൾപ്പെടുത്തിയിട്ടില്ല. ബെംഗളൂരു ദേശീയ ക്രിക്കറ്റ് അക്കാദമിയിൽ ഫിറ്റ്നെസ് ടെസ്റ്റിലാണ് സഞ്ജു. അതു കഴിഞ്ഞാൽ ടീമിനൊപ്പം ചേരുമെന്ന് കേരള ക്രിക്കറ്റ് അസോസിയേഷൻ വ്യക്തമാക്കി. പരിക്കേറ്റ റോബിൻ ഉത്തപ്പയും ഇരുപതംഗ ടീമിൽ ഇല്ല.
പതിനേഴുകാരനായ പുതുമുഖം ഏദൻ ആപ്പിൾ ടോം ആണ് ടീമിലെ ഏറ്റവും പ്രായം കുറഞ്ഞ താരം. വിക്കറ്റ് കീപ്പർ ബാറ്റർ വരുൺ നായനാർ, ഇടംകൈയൻ ഓപ്പണിങ് ബാറ്റർ ആനന്ദ് കൃഷ്ണൻ എന്നിവരും ടീമിലെ പുതുമുഖങ്ങളാണ്.
രാജ്കോട്ടിൽ ഫെബ്രുവരി 17 മുതൽ കേരളത്തിന്റെ മത്സരങ്ങൾ ആരംഭിക്കും. മേഘാലയയാണ് ആദ്യ എതിരാളികൾ. ഫെബ്രുവരി 24ന് ഗുജറാത്തിനെതിരേയും മാർച്ച് മൂന്നിന് മധ്യപ്രദേശിനെതിരേയും കളത്തിലിറങ്ങും.
