കണ്ണൂർ:-രാമന്തളി പഞ്ചായത്തിലെ പാലക്കോട് അഴിമുഖത്ത് അടിഞ്ഞുകൂടിയ മണൽ ഡ്രെഡ്ജ് ചെയ്തു നിക്ഷേപിക്കുന്നതിന് അനുയോജ്യമായ പ്രദേശം കണ്ടെത്തുന്നതിനായി കോർ കമ്മിറ്റി യോഗം ചേർന്നു. എംഎൽഎമാരായ ടി ഐ മധുസൂദനൻ , എം വിജിന്‍ എന്നിവർ പങ്കെടുത്ത യോഗത്തിൽ പയ്യന്നൂർ മുൻസിപാലിറ്റിയിലെ ഉളിയത്ത് കടവ്, കുഞ്ഞിമംഗലം ഗ്രാമപഞ്ചായത്തിലെ എടാട്ട്, പുതിയ പുഴക്കര പാലം, രാമന്തളി പഞ്ചായത്തിലെ ചിറ്റടിക്കുന്ന് എന്നീ പ്രദേശങ്ങൾ പരിഗണിക്കുവാൻ തീരുമാനമായി. രാമന്തളി പഞ്ചായത്ത് ഹാളിൽ നടന്ന യോഗത്തിൽ തളിപ്പറമ്പ് ആർഡിഒ സി.കെ ഷാജി അധ്യക്ഷനായി.
പ്രായോഗികത പരിശോധിച്ച് രണ്ട് ദിവസത്തിനകം ഉചിതമായ സ്ഥലം കണ്ടെത്തി ജില്ലാ കലക്ടറെ അറിയിക്കുവാൻ കെഇഎംഡിഇഎൽ നോട് കമ്മിറ്റി നിർദ്ദേശിച്ചു. ജില്ലാ കളക്ടർ അരുൺ.കെ.വിജയന്റെ നിർദ്ദേശം അനുസരിച്ച് വിളിച്ച കോർ കമ്മിറ്റി യോഗത്തിൽ രാമന്തളി ഗ്രാമപഞ്ചായത്ത് പ്രസിഡൻ്റ് വി ഷൈമ, മാടായി ഗ്രാമപഞ്ചായത്ത് പ്രസിഡൻ്റ് സഹീദ് കായിക്കാരൻ, ഡെപ്യൂട്ടി കലക്ടർ കെ.വി ശ്രുതി, കെ.എം.ഡി.ഇ.എൽ മാനേജിംഗ് ഡയറക്ടർ സാബിർ, പയ്യന്നൂർ എസ് ഐ എൻ.കെ ഗിരീഷ്, വിവിധ വകുപ്പ് ഉദ്യോഗസ്ഥർ എന്നിവർ പങ്കെടുത്തു
