ദീർഘദൂരയാത്രയിലോ അല്ലെങ്കിൽ പെട്ടെന്ന് ഫോണിൽ ചാർജ് തീർന്നാലോ എവിടെയാണ് എങ്ങനെയാണെന്നൊന്നും നാം നോക്കാറില്ല. ഒരു പ്ലഗ് കണ്ടാൽ ഉടനെ നാം ഫോൺ ചാർജ് ചെയ്യാറല്ലേ പതിവ്. എന്നാൽ ഇനി അങ്ങനെ എവിടെനിന്നെങ്കിലും ഒക്കെ ഫോൺ ചാർജ് ചെയ്യാൻ വരട്ടെ. പൊതുഇടങ്ങളിൽ നിന്ന് ഫോൺ ചാർജ് ചെയ്യുമ്പോൾ ശ്രദ്ധിക്കണമെന്ന മുന്നറിയിപ്പുമായി എത്തിയിരിക്കുകയാണ് കേരള പൊലീസ്. 'ജ്യൂസ് ജാക്കിങ് എന്ന പേരിൽ അറിയപ്പെടുന്ന സൈബർ തട്ടിപ്പിന് നിങ്ങൾ ഇരയായേക്കുമെന്നാണ് പൊലീസ് പറയുന്നത്. പലവട്ടം റിപ്പോർട്ട് ചെയ്യപ്പെട്ടിട്ടുള്ള ഈ തട്ടിപ്പിനെതിരെ ജാഗ്രത പാലിക്കണമെന്നാണ് പൊലീസ് മീഡിയ സെന്റർ മുന്നറിയിപ്പ് നൽകുന്നത്.
എന്താണ് ജ്യൂസ് ജാക്കിങ്?
കേരള പൊലീസിൻ്റെ മുന്നറിയിപ്പ് വന്ന പശ്ചാത്തലത്തിൽ ജ്യൂസ് ജാക്കിങ് എന്താണെന്ന് വിശദമായി അറിയാം. ജ്യൂസ് ജാക്കിങ് എന്നത് ഒരുതരം സൈബർ ആക്രമണമാണ്. ഇതിലൂടെ ഒരു പൊതു യുഎസ്ബി ചാർജിംഗ് പോർട്ടുകൾ ഉപയോഗിച്ച് നിങ്ങളുടെ ഫോണിൽ നിന്നോ ടാബ്ലെറ്റ്, ലാപ്ടോപ് എന്നിവയിൽ നിന്നോ ഡാറ്റ മോഷ്ടിക്കാനോ മാൽവെയർ ഇൻസ്റ്റാൾ ചെയ്യാനോ കഴിയും. 'ജ്യൂസ് ജാക്കിങ് എന്ന പദം നിങ്ങളുടെ ഫോണിനെ 'ജ്യൂസ് അപ്പ് ചെയ്യുക എന്ന ആശയത്തെയും അതിനെ 'ഹൈജാക്ക്' ചെയ്യുക എന്ന പ്രവർത്തിയേയും സംയോജിപ്പിക്കുന്നതാണ്. വിമാനത്താവളങ്ങൾ, ഹോട്ടലുകൾ, കോഫി ഷോപ്പുകൾ എന്നിവിടങ്ങളിൽ കാണപ്പെടുന്ന പൊതു ചാർജിങ് സ്റ്റേഷനുകളിൽ പലപ്പോഴും യുഎസ്ബി പോർട്ടുകൾ ഉണ്ടാവും. ഈ യുഎസ്ബി കണക്‌ടറുകൾ പവർ, ഡാറ്റ ട്രാൻസ്ഫർ എന്നിവ സുഗമമാക്കാൻ കഴിവുള്ളവയാണ്, ഇത് ഹാക്കർമാർക്ക് നിങ്ങളുടെ ഫോൺ ആക്സസ് ചെയ്യുന്നതിനുള്ള എളുപ്പവഴിയാകുന്നു. അതേസമയം, ജ്യൂസ് ജാക്കിങിന് വളരെ സങ്കീർണമായ സാങ്കേതികവിദ്യകളൊന്നും ആവശ്യമില്ലെന്നതാണ് ശ്രദ്ധേയം. ഒരു പൊതു യുഎസ്ബി പോർട്ടോ കേബിളോ മാത്രം മതിയാകും. ഇതിലൂടെ നിങ്ങളുടെ പാസ്‌വേർഡുകൾ, ഇ-മെയിലുകൾ സാമ്പത്തിക വിവരങ്ങൾ എന്നിവ ഹാക്കർമാരുടെ കൈയിലേക്കെത്തുന്നു.
ജ്യൂസ് ജാക്കിങിൽ നിന്ന് എങ്ങനെ രക്ഷനേടാം?
ജ്യൂസ് ജാക്കിംഗ് ഒഴിവാക്കാനുള്ള ഏറ്റവും ലളിതമായ മാർഗം പൊതു യുഎസ്ബി പോർട്ടിനു പകരം നിങ്ങളുടെ സ്വന്തം ചാർജിംഗ് കേബിളുകളും പവർ അഡാപ്റ്ററുകളും ഉപയോഗിക്കുക എന്നതാണ്. യുഎസ്ബി ഡേറ്റ ബ്ലോക്കർ ഉപയോഗിക്കുക ദീർഘദൂര യാത്രകളിൽ നിർബന്ധമായും പോർട്ടബിൾ ചാർജർ കരുതുക. സുരക്ഷിത ചാർജിങ് സ്റ്റേഷനുകൾ ഉപയോഗിക്കുക. നിങ്ങളുടെ സ്മ‌ാർട്ട്ഫോണിന്റെ ഓപ്പറേറ്റിങ് സിസ്റ്റവും ആപ്ലിക്കേഷനുകളും പതിവായി അപ്ഡേറ്റ് ചെയ്യുക. യുഎസ്ബി പോർട്ടിലേക്ക് കണക്റ്റ് ചെയ്യുമ്പോൾ ഡാറ്റാ ട്രാൻസ്‌ഫറുകൾ പ്രവർത്തനരഹിതമാക്കുക.
