മലപ്പുറം :- ദേശീയപാതയിലെ വള്ളുവമ്പ്രം മുസ്ലിയാർപീടികയിൽ ബൈക്ക് ബസിനടിയിലേക്ക് മറിഞ്ഞുണ്ടായ ദാരുണ അപകടത്തിൽ യുവാവ് മരണപ്പെട്ടു. കൊണ്ടോട്ടി മേലങ്ങാടിയിലെ പാലക്കൽ മുഹമ്മദലിയുടെ മകൻ ഷിബിൽ റഹ്മാൻ (26) ആണ് മരിച്ചത്. ബൈക്കിൽ ഒപ്പമുണ്ടായിരുന്ന സഹയാത്രികൻ തറയിട്ടാൽ സ്വദേശി എം.വി. ആഷിഖിന് (24) അപകടത്തിൽ സാരമായി പരുക്കേറ്റു. ആഷിഖിനെ അടിയന്തര ചികിത്സയ്ക്കായി കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിരിക്കുകയാണ്. ഇന്നലെ രാത്രി ഏഴുമണിയോടെയായിരുന്നു നാടിനെ നടുക്കിയ ഈ അപകടം സംഭവിച്ചത്. വെള്ളൂരിലെ സുഹൃത്ത് ടി.വി. മുസ്തഫയുടെ വിവാഹവീട്ടിലേക്ക് സുഹൃത്തുക്കൾക്കൊപ്പം ബൈക്കിൽ പോകുന്നതിനിടെയാണ് ഷിബിൽ അപകടത്തിൽപ്പെട്ടത്.
ഷിബിലും ആഷിഖും ഒരു ബൈക്കിലും, സുഹൃത്തായ യാസീൻ മറ്റൊരു ബൈക്കിലുമായിരുന്നു യാത്ര ചെയ്തിരുന്നത്. മുസ്ലിയാർപീടികയിൽ വെച്ച് മുന്നിലുണ്ടായിരുന്ന തമിഴ്നാട് ആർ.ടി.സി സേലം ബസിനെ മറികടക്കാൻ ശ്രമിക്കുന്നതിനിടെ, എതിർദിശയിൽ നിന്നും വന്ന കാറിലിടിച്ച് ബെക്കിൻ്റെ നിയന്ത്രണം നഷ്ടപ്പെടുകയായിരുന്നു. ബൈക്കിൽ നിന്നും തെറിച്ചുവീണ ഷിബിൽ തൊട്ടടുത്ത ബസിനടിയിലേക്ക് വീഴുകയായിരുന്നുവെന്ന് നാട്ടുകാർ പറഞ്ഞു. ഉടൻ തന്നെ ഓടിക്കൂടിയ നാട്ടുകാർ ഇരുവരെയും മഞ്ചേരി മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ഗുരുതരമായി പരിക്കേറ്റ ഷിബിലിന്റെ ജീവൻ രക്ഷിക്കാനായില്ല.
കളിയും ചിരിയുമായി സന്തോഷത്തോടെ അതിഥികളെ സ്വീകരിച്ചിരുന്ന വെള്ളൂരിലെ കല്ല്യാണവീട്ടിലേക്ക് പെട്ടെന്നാണ് ഈ ഞെട്ടിക്കുന്ന മരണവാർത്ത എത്തിയത്. തങ്ങളുടെ പ്രിയ സുഹൃത്ത് കല്ല്യാണം കൂടാൻ വരുന്നതിനിടെ തൊട്ടടുത്ത കിലോമീറ്ററുകൾക്കപ്പുറത്ത് വെച്ച് അപകടത്തിൽ മരണപ്പെട്ടു എന്ന വാർത്ത ഉൾക്കൊള്ളാൻ സുഹൃത്തുക്കൾക്കായില്ല. വിവാഹ വീട്ടിലേക്ക് വെറും മൂന്ന് കിലോമീറ്റർ ദൂരം മാത്രം ശേഷിക്കെയാണ് വിധി ഷിബിലിൻ്റെ ജീവൻ കവർന്നത്. മരണവാർത്തയറിഞ്ഞ് കല്ല്യാണവീട് നിമിഷനേരം കൊണ്ട് മൂകമായി മാറി. കരിപ്പൂർ വിമാനത്താവളത്തിലെ കരാർ ജീവനക്കാരനായിരുന്നു അന്തരിച്ച ഷിബിൽ റഹ്മാൻ. മാതാവ്: മൈമൂന. സഹോദരങ്ങൾ: ഷബീൽ സാഹിൽ. മൃതദേഹം പോസ്റ്റ്മോർട്ടം നടപടികൾക്ക് ശേഷം ഇന്ന് കൊണ്ടോട്ടി മേലങ്ങാടി ജുമാമസ്ജിദ് ഖബർസ്ഥാനിൽ ഖബറടക്കും.
