ന്യൂഡല്‍ഹി:- ഇന്ത്യയില്‍ നിന്ന് സൗദിയിലേക്കും തിരിച്ചുമുളള വിമാനസര്‍വീസുകള്‍ സൗദി അറേബ്യ നിറുത്തലാക്കി. ഇന്ത്യയില്‍ കൊവിഡ് രോഗികള്‍ പെരുകുന്ന സാഹചര്യത്തിലാണ് സൗദിയുടെ നടപടി എന്നാണ് റിപ്പോര്‍ട്ട്. ഇനിയൊരു അറിയിപ്പ് ഉണ്ടാകുന്നതുവരെ നിരോധനം തുടരും. സൗദി വ്യോമയാന അതോറിറ്റി വിമാനകമ്ബനികള്‍ക്ക് ഇതുസംബന്ധിച്ച്‌ നിര്‍ദ്ദേശം കൈമാറി.
ഇന്ത്യയിലെ ആകെ രോഗികളുടെ എണ്ണം 56 ലക്ഷം കടന്നു എന്നാണ് റിപ്പോര്‍ട്ട്. മരണം 90,000 ത്തിനടുത്തെത്തി. രോഗബാധിതരുടെ എണ്ണത്തില്‍ രണ്ടാം സ്ഥാനത്തുള്ള ഇന്ത്യയില്‍ രോഗമുക്തി നിരക്കില്‍ റെക്കോര്‍ഡ് വര്‍ദ്ധനവാണ് കഴിഞ്ഞ ദിവസം റിപ്പോര്‍ട്ട് ചെയ്തത്. ഇന്നലെ ഒരു ലക്ഷത്തിലധികം പേര്‍ (1,01,468) രോഗമുക്തി നേടി. 45 ലക്ഷത്തോളം പേരാണ് ഇതുവരെ രോഗമുക്തരായത്. ഇതില്‍ 79 ശതമാനവും മഹാരാഷ്ട്ര, കര്‍ണാടക, ആന്ധ്രപ്രദേശ്, ഉത്തര്‍പ്രദേശ്, തമിഴ്‌നാട്, ഒഡീഷ, ഡല്‍ഹി, കേരളം, പശ്ചിമബംഗാള്‍, പഞ്ചാബ് എന്നീ സംസ്ഥാനങ്ങളില്‍ നിന്നാണ്.
