കണ്ണൂർ :- ബെംഗളൂരു മലയാളികളുടെ കാത്തിരിപ്പിനൊടുവിൽ കേരളത്തിലേക്കുള്ള തീവണ്ടിസർവീസിന്റെ കാര്യത്തിൽ അന്തിമതീരുമാനമായി . യശ്വന്തപുര കണ്ണൂർ എക്സ്പ്രസ് 20 - ന് ഓടിത്തുടങ്ങുമെന്ന് റെയിൽവേ അധികൃതർ അറിയിച്ചു . നവംബർ 30 വരെ ഉത്സവകാല പ്രത്യേക സർവീസായിട്ടാണ് തീവണ്ടി ഓടുക . എല്ലാദിവസവും സർവീസുണ്ടാകും .
യശ്വന്തപുര - കണ്ണൂർ എക്സ്പ്രസ് ( 06537 ) എല്ലാ ദിവസവും രാത്രി എട്ടിന് യശ്വന്തപുരയിൽനിന്ന് പുറപ്പെട്ട് പിറ്റേദിവസം രാവിലെ 9.50 ന് കണ്ണൂരിലെത്തും . തിരിച്ച് കണ്ണൂർ യശ്വന്തപുര എക്സ്പ്രസ് ( 06538 ) വൈകീട്ട് 6.05 - ന് കണ്ണൂരിൽനിന്ന് പുറപ്പെട്ട് പിറ്റേദിവസം രാവിലെ എട്ടിന് യശ്വന്തപുരയിലെത്തും . കോവിഡിനുമുമ്പ് സർവീസ് നടത്തിയിരുന്ന യശ്വന്തപുര- കണ്ണൂർ യശ്വന്തപുര എക്സ്പ്രസിന്റെ ( 16527/16528 ) അതേ പാതയും സമയക്രമവുമാകും പ്രത്യേക തീവണ്ടിക്കും ഉണ്ടാവുക . ഒരു എ.സി. ടൂ ടയർ കോച്ചും രണ്ട് എ.സി. ത്രീ ടയർ കോച്ചുകളും 12 സെക്കൻഡ് ക്ലാസ് സ്ലീപ്പർ കോച്ചുകളും നാല് ജനറൽ കോച്ചുകളും രണ്ട് ലഗേജ് കോച്ചുകളുമുണ്ടാകും .
