എ.കെ.ആന്റണി അഥവാ അറക്കപറമ്പിൽ കുര്യൻ ആന്റണി. ഭാരതത്തിന്റെ പ്രതിരോധമന്ത്രിയായിരുന്നു. കേരളത്തിന്റെ മുൻ മുഖ്യമന്ത്രി, കേരള നിയമസഭാ പ്രതിപക്ഷനേതാവ് എന്നീ നിലകളിൽ പ്രശസ്തനായ രാഷ്ട്രീയ നേതാവ്. 1977-78, 1995-96, 2001-04 കാലയളവുകളിൽ എ.കെ.ആന്റണി കേരളത്തിന്റെ മുഖ്യമന്ത്രിയായിരുന്നു. 1996 മുതൽ 2001 വരെ കേരള നിയമസഭയിലെ പ്രതിപക്ഷനേതാവായി പ്രവർത്തിച്ചു. 1977-ൽ മുഖ്യമന്ത്രിയാകുമ്പോൾ 37 വയസ്സായിരുന്ന ആന്റണി കേരളത്തിലെ ഏറ്റവും പ്രായം കുറഞ്ഞ മുഖ്യമന്ത്രിയായിരുന്നു.
*ജനനം, വിദ്യാഭ്യാസം*
1940 ഡിസംബർ 28 നു അറക്കപറമ്പിൽ കുരിയൻ പിള്ളയുടെയും ഏലിക്കുട്ടിയുടേയും മകനായി ആലപ്പുഴ ജില്ലയിലെ ചേർത്തലയിലാണു് എ.കെ.ആന്റണി ജനിച്ചതു്. പ്രാഥമിക വിദ്യാസം ഗവ. ഹൈസ്കൂൾ ചേർത്തലയിൽ. പിന്നീട് എറണാകുളം മഹാരാജാസിൽ നിന്നും ബി.എ ബിരുദവും, എറണാകുളം ലോ കോളേജിൽ നിന്നും ബി.എൽ ബിരുദവും നേടി.
*രാഷ്ട്രീയജീവിതം*
ഇന്ത്യയിൽ കൂടുതൽ കാലം പ്രധിരോധ വകുപ്പ് കൈകാര്യം ചെയ്ത മന്ത്രി ആണ് എ.കെ. ആന്റണി, തുടർച്ചയായി 7 വര്ഷം. 37 ആം വയസ്സിൽ കേരളത്തിലെ പ്രായം കുറഞ്ഞ മുഖ്യ മന്ത്രി (3 ഘട്ടങ്ങളിലായി 6 വര്ഷം). 32 ആം വയസ്സിൽ കേരളത്തിലെ പ്രായം കുറഞ്ഞ കെ.പി.സി.സി പ്രസിഡണ്ട്‌ (3 ഘട്ടങ്ങളിലായി 13 വർഷം). കേരള സ്റ്റുഡൻസ് യൂണിയൻ എന്ന കോൺഗ്രസ് വിദ്യാർത്ഥി സംഘടനയിലൂടെ പൊതുധാരാ രാഷ്ട്രീയത്തിലേയ്ക്കു കടന്നു വന്ന അദ്ദേഹം കെ.എസ്.യു., യൂത്ത് കോൺഗ്രസ്സ്, എന്നിവയുടെ പ്രസിഡന്റായും എ.ഐ.സി.സിയുടെ ജനറൽ സെക്രട്ടറിയായും ട്രഷറർ ആയും സേവനമനുഷ്ടിച്ചിട്ടുണ്ടു്. ഒരണ സമരം തുടങ്ങി പല സമരങ്ങളും ആന്റണി നയിച്ചിട്ടുണ്ട്. ഇന്ത്യൻ നാഷണൽ കോൺഗ്രസ്സിന്റെ പ്രവർത്തക സമിതിയിലേക്കു നിരവധി തവണ തിരഞ്ഞെടുക്കപ്പെട്ടിട്ടുണ്ടു്.
ഇന്ത്യൻ പാർലമെന്റിലെ രാജ്യസഭയിൽ 1985 മുതൽ 91 വരെയും 1991 മുതൽ 95 വരെയും അംഗമായിരുന്നു. നരസിംഹറാവു മന്ത്രിസഭയിൽ പൊതുവിതരണം വകുപ്പായുള്ള ക്യാബിനറ്റ് മന്ത്രിയായിരുന്നു.
ഇപ്പോൾ കോൺഗ്രസ് പ്രവർത്തക സമിതി അംഗവും കോൺഗ്രസ് അച്ചടക്ക സമിതി അംഗവുമായി പ്രവർത്തിക്കുന്നു. കർണാടകത്തിലെ പാർട്ടി കാര്യങ്ങളുടെ ചുമതലയും ആന്റണിക്കാണ്. 2006-ലാണ് ഇന്ത്യയുടെ പ്രതിരോധമന്ത്രിയായത്.
കേരളത്തിൽ ചാരായ നിരോധനം കൊണ്ടുവന്നത് ആന്റണിയാണ്. സ്വകാര്യ മാനേജുമെന്റുകൾക്ക് സ്വാശ്രയ ഉന്നതവിദ്യാഭ്യാസ സ്ഥാപനങ്ങൾ തുടങ്ങാൻ അനുമതി കൊടുത്തതും ആന്റണിയാണ്.
*തിരഞ്ഞെടുപ്പുകൾ*
2001 - ചേർത്തല നിയമസഭാമണ്ഡലം എ.കെ. ആന്റണി കോൺഗ്രസ് (ഐ.), യു.ഡി.എഫ്. സി.കെ. ചന്ദ്രപ്പൻ സി.പി.ഐ., എൽ.ഡി.എഫ്.
1996 ചേർത്തല നിയമസഭാമണ്ഡലം എ.കെ. ആന്റണി കോൺഗ്രസ് (ഐ.), യു.ഡി.എഫ്. സി.കെ. ചന്ദ്രപ്പൻ സി.പി.ഐ., എൽ.ഡി.എഫ്.
1995* (1) തിരൂരങ്ങാടി നിയമസഭാമണ്ഡലം എ.കെ. ആന്റണി കോൺഗ്രസ് (ഐ.)
1970 ചേർത്തല നിയമസഭാമണ്ഡലം എ.കെ. ആന്റണി കോൺഗ്രസ് (ഐ.) എൻ.പി. തണ്ടാർ സി.പി.എം.
വി.എ. ബീരാൻ സാഹിബ് ന്റെ മരണത്തെ തുടർന്നാണ് തിരൂരങ്ങാടിയിൽ ഉപതിരഞ്ഞെടുപ്പ് ഉണ്ടായത്.
*കുടുംബം*
എ.കെ.ആന്റണി വിവാഹിതനും രണ്ടു കുട്ടികളുടെ അച്ഛനുമാണ്. ഭാര്യ എലിസബത്ത്. മക്കൾ അജിത്, അനിൽ.
