കണ്ണൂർ: ചൊവ്വാഴ്ച നടക്കുന്ന കടയടപ്പ് സമരത്തിൽ വ്യാപാരി വ്യവസായി സമിതി പങ്കെടുക്കില്ലെന്ന് ജില്ലാ പ്രസിഡന്റ് വി.ഗോപിനാഥ്, സെക്രട്ടറി പി.എം.സുഗുണൻ എന്നിവർ അറിയിച്ചു. കോവിഡ് പ്രതിരോധ നിയന്ത്രണങ്ങളോട് സഹകരിക്കുന്ന വ്യാപാരി സമൂഹത്തെ സർക്കാരിനെതിരെ തിരിക്കാനാണ് ഏകോപന സമിതിക്ക് പിറകിൽ കളിക്കുന്നവർ ലക്ഷ്യമിടുന്നതെന്ന് ഇരുവരും ആരോപിച്ചു. ഭൂരിപക്ഷം കടകൾ തുറക്കുന്ന തിങ്കൾ, ബുധൻ, വെള്ളി ദിവസങ്ങളിൽ കടയടപ്പ് സമരം നടത്താതെ ഭൂരിപക്ഷം പേർക്കും കട തുറക്കാൻ അനുമതിയില്ലാത്ത ചൊവ്വാഴ്ച ‘കടയടപ്പ്’ പറയുന്നവരുടെ ഉള്ളിലിരിപ്പ് വ്യക്തമാണ്. കോവിഡ് കുറയുന്നതിനനുസരിച്ച് പരമാവധി ഇളവുകൾ നൽകാൻ ദുരന്തനിവാരണ അതോറിറ്റി മുമ്പാകെ സമിതി നിരന്തരം അഭ്യർഥിച്ചതാണ്. വിപണിയിലെ ഇടപെടലുകൾ യാഥാർഥ്യ ബോധത്തോടെയാവണമെന്ന് സമിതി നേതാക്കൾ അഭ്യർഥിച്ചു. രോഗവ്യാപനനിരക്ക് കുറയുന്ന മുറയ്ക്ക് ഇളവുകൾ നൽകി കമ്പോളത്തെ സജീവമാക്കി നിർത്തണമെന്ന് ഭാരവാഹികൾ ആവശ്യപ്പെട്ടു.
