കുറ്റ്യാട്ടൂർ മാങ്ങയ്ക്ക് ദേശസൂചിക പദവി ലഭിച്ചതിനുള്ള സാക്ഷ്യപത്ര കൈമാറൽ ചടങ്ങ് നടന്നു

കുറ്റ്യാട്ടൂർ :- കുറ്റ്യാട്ടൂർ മാങ്ങയ്ക്ക് ദേശസൂചിക പദവി (Geographical Indication Tag) ലഭിച്ചതിനുള്ള സാക്ഷ്യപത്രം കൈമാറൽ ചടങ്ങ്  കുറ്റ്യാട്ടൂർ ഗ്രാമ പഞ്ചായത്ത് ഓഫീസ് അങ്കണത്തിൽ കേരള തദ്ദേശ സ്വയംഭരണ- എക്സൈസ് വകുപ്പ് മന്ത്രി എം.വി ഗോവിന്ദൻ മാസ്റ്റർ  നിർവഹിച്ചു.

കുറ്റ്യാട്ടൂർ മാങ്ങയുടെ പ്രശസ്തി ലോക ഭൂപടത്തിൽ അടയാളപ്പെടാൻ പോകുകയാണെന്നും അതിലെ ഒരു നിർണ്ണായക ഘട്ടമാണ് ഈ ദേശ സൂചികാ പദവിയെന്നും മന്ത്രി പറഞ്ഞു.

കുറ്റ്യാട്ടൂർ മാങ്ങയുടെ ഉത്പന്നങ്ങൾ ലോകവിപണി കീഴടക്കുന്നതിനുള്ള  തന്ത്രങ്ങൾ കണ്ടെത്തി അവ പ്രാവർത്തികമാക്കാൻ നമുക്ക് സാധിക്കണമെന്നും മന്ത്രി പറഞ്ഞു.

പൽപ്പെടി നിർമ്മാണത്തിനായി മാവിലശേഖരിച്ച് മറ്റൊരു സ്ഥലത്തേക്ക് കൊണ്ടു പോവുന്നതിന് പകരം ഇവിടെ തന്നെ അത് നിർമ്മിക്കാനുള്ള യൂണിറ്റുകൾ സ്ഥാപിക്കുന്നതിനെ പറ്റി തദ്ദേശ സ്ഥാപനങ്ങൾ പദ്ദതികൾ ആസൂത്രണം ചെയ്യണമെന്നും മന്ത്രി കൂട്ടി ചേർത്തു.

ഐ പി ആർ സെൽ റിട്ട. പ്രൊഫസർ ഡോ. സി ആർ എൽസി, പത്രപ്രവർത്തകനായ ശ്രീപദെ എന്നിവരെ ചടങ്ങിൽ വച്ച് ആദരിച്ചു.

ചടങ്ങിൽ വച്ച് മാവില ഉപയോഗിച്ച് തയ്യാറാക്കുന്ന പൽപ്പൊടിക്കായി കുറ്റ്യാട്ടൂർ കുടുംബശ്രീ പ്രവർത്തകർ ശേഖരിച്ച മാവിലയ്ക്ക് നീലേശ്വരം ഇനോ വെൽനസ്സ് നിക്ക കമ്പിനി നൽകുന്ന മൂന്നര ലക്ഷം രൂപയുടെ ചെക്ക് ചടങ്ങിൽ വച്ച് മന്ത്രി കൈമാറി.

 കുറ്റ്യാട്ടൂർ മാങ്ങയിൽ നിന്നുമുള്ള മൂല്യവർദ്ധിത ഉൽപന്നങ്ങളുടെ വിപണിയിൽ ഇറക്കൽ ഉദ്ഘാടനം ജില്ലാ പഞ്ചായത്ത് പ്രസിഡൻ്റ് ശ്രീമതി പി പി ദിവ്യ നിർവ്വഹിച്ചു.

കുറ്റ്യാട്ടർ ഗ്രാമ പഞ്ചായത്ത് പ്രസിഡണ്ട്    പി പി റെജി അദ്ധ്യക്ഷത വഹിച്ചു. കെ.കെ ആദർശ് റിപ്പോർട്ട് അവതരിപ്പിച്ചു. കേരളാ അഗ്രികൾച്ചറൽ യൂണിവേഴ്സിറ്റി വൈസ്  ചാൻസിലർ ഡോ.ചന്ദ്രബാബു മുഖ്യ പ്രഭാഷണം നടത്തി .

കൊളച്ചേരി ഗ്രാമപഞ്ചായത്ത് പ്രസിഡൻറ് കെ പി അബ്ദുൾ മജീദ്, കണ്ണപുരം ഗ്രാമ പഞ്ചായത്ത് പ്രസിഡൻ്റ് രതി കെ, ഡോ.പി ജയരാജ് ,എൻ അനിൽ കുമാർ, വി.പത്മനാഭൻ, പി പുരുഷോത്തമൻ മാസ്റ്റർ, അബ്ദുറഹ്മാൻ മാസ്റ്റർ, ഇ പി ആർ വേശാല എന്നിവർ ആശംസകൾ നേർന്ന് സംസാരിച്ചു.

ചടങ്ങിന് ഗ്രാമപഞ്ചായത്ത് സെക്രട്ടറി പ്രകാശൻ കെ സ്വാഗതവും കുറ്റ്യാട്ടൂർ മാംഗോ പ്രൊഡ്യൂസർ കമ്പനി ചെയർമാൻ വി ഒ പ്രഭാകരൻ നന്ദിയും രേഖപ്പെടുത്തി.

തുടർന്ന് കുറ്റ്യാട്ടൂർ മാങ്ങയുടെ വികസന സാധ്യതകളെയും വിപണന സാധ്യതകളെയും സംബന്ധിച്ച് ചർച്ചയും നടത്തപ്പെട്ടു.