ചക്കരക്കല്ല്:- കൂടുതൽ വരുമാനമുണ്ടാക്കിത്തരാമെന്ന് പറഞ്ഞ് വീട്ടമ്മയെ കബളിപ്പിച്ച് 34 പവൻ സ്വർണാഭരണം കൈക്കലാക്കിയ യുവതിയെ ചക്കരക്കല്ല് പോലീസ് അറസ്റ്റ് ചെയ്തു. ചെറുവത്തലമെട്ടയിലെ എൻ.കെ.കെ. ഹൗസിൽ എം.കെ.ഹൈറുന്നിസ (41) യെയാണ് ചക്കരക്കല്ല് സി.ഐ. ശ്രീജിത്ത് കൊടേരിയും സംഘവും അറസ്റ്റ് ചെയ്തത്.
മുണ്ടേരിയിലെ റഹീമയാണ് പരാതിക്കാരി. വീട്ടിൽ സ്വർണം സൂക്ഷിക്കേണ്ടെന്നും തന്നെ ഏല്പിച്ചാൽ ഉയർന്ന പലിശയും വലിയ വരുമാനവുമുണ്ടാക്കിത്തരാമെന്നും പറഞ്ഞ് വിശ്വസിപ്പിച്ചാണ് വീട്ടമ്മയിൽനിന്ന് ഒരുവർഷം മുൻപ്‌ ആഭരണങ്ങൾ കൈക്കലാക്കിയത്. ഏറെനാളുകൾ കഴിഞ്ഞിട്ടും സ്വർണവും തരാമെന്നേറ്റ പണവും തിരിച്ചു കിട്ടാതെ വന്നപ്പോൾ റഹീമ ചക്കരക്കല്ല് പോലീസിൽ പരാതി നൽകി. തുടർന്ന് ചക്കരക്കല്ല് സി.ഐ.യും സംഘവും നടത്തിയ അന്വേഷണത്തിലാണ് ഇവർ അറസ്റ്റിലായത്. ആഭരണങ്ങൾ കണ്ണൂർ ടൗണിലെ ജൂവലറികളിൽ വിറ്റതായി തുടർന്ന് നടന്ന അന്വേഷണത്തിൽ കണ്ടെത്തി. തളിപ്പറമ്പ്, ഇരിട്ടി, മാലൂർ തുടങ്ങിയ ഭാഗങ്ങളിലെ പലരിൽനിന്നും ആഭരണങ്ങൾ തട്ടിയെടുത്തിട്ടുണ്ടെന്നും ഇത് സംബന്ധിച്ച് 10 പരാതികൾ ലഭിച്ചിട്ടുണ്ടെന്നും സി.ഐ. പറഞ്ഞു.
