ശബരിമല :- മണ്ഡലകാലം 39 ദിവസം പിന്നിട്ടപ്പോള്‍ ശബരിമലയിലെ നടവരവ് 204.30 കോടി രൂപയെന്ന് തിരുവിതാംകൂര്‍ ദേവസ്വം ബോര്‍ഡ് പ്രസിഡണ്ട് പി എസ് പ്രശാന്ത്. ഡിസംബര്‍ 25 വരെയുള്ള മൊത്തം നടവരവ് 204,30,76,704 രൂപയാണ്. കുത്തക ലേലം, കാണിക്കയായി ലഭിച്ച നാണയങ്ങള്‍ എന്നിവ കൂടി എണ്ണി കഴിയുമ്പോള്‍ ഈ കണക്കില്‍ കാര്യമായ മാറ്റം ഉണ്ടാകുമെന്ന്‌ പ്രസിഡണ്ട് പറഞ്ഞു.
കാണിക്കയായി ലഭിച്ചത് 63.89 കോടി രൂപയാണ്. അരവണ വില്‍പനയില്‍ 96.32 കോടി രൂപയും അപ്പം വില്‍പനയില്‍ 12.38 കോടി രൂപയും ലഭിച്ചു. മണ്ഡലകാലം തുടങ്ങി ഡിസംബര്‍ 25 വരെ ശബരിമലയില്‍ 31,43,163 പേരാണ് ദര്‍ശനം നടത്തിയത്. മണ്ഡലപൂജക്ക് ശേഷം ഡിസംബര്‍ 27-ന് വൈകിട്ട് 11 മണിക്ക് ശബരിമല നട അടക്കും. മകരവിളക്ക് ഉത്സവത്തിനായി ഡിസംബര്‍ 30-ന് വൈകിട്ട് വീണ്ടും നട തുറക്കും.
