റേഷൻ കാർഡ് മസ്റ്ററിങ് ; 31-നകം പൂർത്തിയാക്കണമെന്ന് കേന്ദ്രസർക്കാർ നിർദേശം

തിരുവനന്തപുരം :- മഞ്ഞ (എ.എ. വൈ), പിങ്ക് (പി.എച്ച്.എച്ച്) റേഷൻ കാർഡുകളിൽ പേര് ഉൾപ്പെട്ടിട്ടുള്ള എല്ലാ അംഗങ്ങളുടെയും മസ്റ്ററിങ് 31-നകം പൂർത്തിയാക്കണമെന്ന് കേന്ദ്രസർക്കാർ  കർശനനിർദേശം നൽകിയതായി മന്ത്രി ജി.ആർ അനിൽ അറിയിച്ചു. ദിവസവും 1.30 മുതൽ നാലു വരെയും ഞായറാഴ്ച ഉൾപ്പെടെ എല്ലാ അവധിദിവസങ്ങളിലും ഒമ്പതുമുതൽ ഏഴുവരെയും മസ്റ്ററിങ് ഉണ്ടായിരിക്കും. റേഷൻ കാർഡിലെ എല്ലാ അംഗങ്ങളും റേഷൻ കടകളിൽ നേരിട്ടെത്തി നിശ്ചിത സമയത്തിനകം മസ്റ്ററിങ് പൂർത്തിയാക്കണം.

റേഷൻകാർഡ് മസ്റ്ററിങ്ങിന് കൂടുതൽ സമയം അനുവദിക്കണമെന്ന് ആവശ്യപ്പെട്ടെങ്കിലും കേന്ദ്രം ഇതുവരെ പ്രതികരിച്ചിട്ടില്ല. 15, 16, 17 തീയതികളിൽ റേഷൻ കടകൾ അവധിയാണ്. ഈ ദിവസങ്ങളിൽ ഒമ്പതു മുതൽ ഏഴുവരെ മസ്റ്ററിങ് ചെയ്യും. 18-ന് ഏതൊരു കാർഡ് അംഗത്തിനും ഏതു റേഷൻകടയിലും മസ്റ്ററിങ് നടത്തുന്നതിന് അവസരം ഉണ്ടാകും.