കൂടാളി :- ആർഷസംസ്കാര ഭാരതിയുടെ നേതൃത്വത്തിൽ നടക്കുന്ന ഭവനം ഭാഗവത ഭൂമികയ്ക്ക് തുടക്കമായി. ആർഷ സംസ്കാര ഭാരതി ദേശീയാധ്യക്ഷൻ കെ.എൻ രാധാകൃഷ്ണൻ മാസ്റ്റർ ആദ്യ ഭാഗവതയജ്ഞം ഉദ്ഘാടനം ചെയ്തു. അന്ധകാരത്തെ മറികടക്കുന്ന കെടാവിളക്കാണ് ഭാഗവതമെന്നും ഭാഗവതം ജീവിത തത്ത്വശാസ്ത്രമാണെന്നും കെ.എൻ രാധാകൃഷ്ണൻ മാസ്റ്റർ അഭിപ്രായപ്പെട്ടു.
ഭാഗവതത്തിലെ മുന്നൂറ്റിമുപ്പത്താറ് അധ്യായങ്ങൾ പന്ത്രണ്ടു മാസങ്ങളിലായി പന്ത്രണ്ട് ഭവനങ്ങളിൽ നടത്തുക എന്നയജ്ഞമാണ് ആർഷസംസ്കാര ഭാരതിയുടെ നേതൃത്വത്തിൽ നടത്തുന്നത്. കൂടാളി ശ്രീകൃഷ്ണ കൃപയിൽ നടന്ന പരിപാടിയിൽ യജ്ഞാചാര്യൻ എ.കെ നാരായണൻ നമ്പൂതിരി കാർമ്മികത്വം വഹിച്ചു. വി.വി മുരളീധരവാര്യർ, ഉണ്ണികൃഷ്ണവാര്യർ പട്ടാനൂർ എന്നിവർ വിവിധ അധ്യായങ്ങളെ അധികരിച്ച് പ്രഭാഷണം നടത്തി. അഞ്ച് സനാതന ധർമ്മ പാഠശാലകളിലെ പഠിതാക്കളാണ് യജ്ഞത്തിൽ പങ്കെടുക്കുന്നത്. കെ.എം രാമചന്ദ്രൻ നമ്പ്യാർ, എ.എം ജയചന്ദ്ര വാര്യർ, റീജ ഭട്ടതിരിപ്പാട്, ഷിനോജ് ചാവശ്ശേരി എന്നിവർ പങ്കെടുത്തു.
