തിരുവനന്തപുരം :- രണ്ടുമാസത്തെ സാമൂഹികസുരക്ഷാ പെൻഷൻ, ക്ഷേമനിധി പെൻഷൻ എന്നിവയുടെ വിതരണം ചൊവ്വാഴ്ച തുടങ്ങും. 3200 രൂപയാണ് ലഭിക്കുക. കഴിഞ്ഞമാസം ഒരുമാസത്തെ പെൻഷൻ നൽകിയിരുന്നു. വിഷു, ഈസ്റ്റർ, റംസാൻ ആഘോഷക്കാലത്ത് 4800 രൂപയാണ് ഓരോരുത്തർക്കും ഉറപ്പാക്കിയതെന്നാണ് സർക്കാർ വിശദീകരണം. ഇനി നാലുമാസത്തെ കുടിശ്ശികയുണ്ട്.
ബാങ്ക് അക്കൗണ്ട് നമ്പർ നൽകിയിട്ടുള്ളവർക്ക് അതുവഴിയും മറ്റുള്ളവർക്ക് സഹകരണ സംഘങ്ങൾ വഴി നേരിട്ട് വീട്ടിലും എത്തിക്കും. 62 ലക്ഷം ക്ഷേമ പെൻഷൻ ഗുണഭോക്താക്കളിൽ മസ്റ്ററിങ് നടത്തിയ മുഴുവൻപേർക്കും തുക ലഭിക്കും. 6.88 ലക്ഷം പേരുടെ കേന്ദ്രസർക്കാർ വിഹിതവും സംസ്ഥാനം അനുവദിച്ചിട്ടുണ്ട്. കഴിഞ്ഞ വർഷം ഏപ്രിൽ മുതൽ കേന്ദ്രസർക്കാർ പെൻഷൻ വിഹിതം മുടക്കിയ സാഹചര്യത്തിലാണ് കേരളം മുൻകൂറായി തുക നൽകുന്നത്.
