തിരുവനന്തപുരം :- സീറ്റൊഴിവുണ്ടെങ്കിൽ കെ.എസ്.ആർ.ടി.സി സൂപ്പർ ഫാസ്റ്റിന് ധൈര്യമായി കൈകാണിക്കാം. സ്റ്റോപ്പല്ലെങ്കിലും ഏത് സമയത്തായാലും ബസ് നിർത്തും. ഒഴിഞ്ഞ സീറ്റുകളുമായി ഇനി സൂപ്പർക്ലാസ് ബസുകൾ യാത്ര ചെയ്യേണ്ടതില്ലെന്നാണ് ജീവനക്കാർക്കുള്ള നിർദേശം. സീറ്റൊഴിവുണ്ടങ്കിലും പ്രധാന സ്റ്റോപ്പുകളിൽ മാത്രമായിരുന്നു ഇപ്പോൾ സൂപ്പർക്ലാസ് ബസുകൾ നിർത്തിയിരുന്നത്. സ്റ്റോപ്പുകൾ ഇല്ലാത്ത സ്ഥലങ്ങളിൽ നിർത്തുമ്പോൾ മറ്റു വാഹനങ്ങൾക്ക് തടസ്സമുണ്ടാകാതിരിക്കാൻ ശ്രദ്ധിക്കണമെന്നും ഗതാഗത നിയമങ്ങൾ പാലിച്ചുവേണം വാഹനം നിർത്തേണ്ടതെന്നും ഡ്രൈവർമാർക്കുള്ള കർശന നിർദേശത്തിൽ പറയുന്നു.
യാത്രക്കാർ കുറഞ്ഞ പശ്ചാത്തലത്തിലാണ് കെ.എ സ്.ആർ.ടി.സി പരിഷ്‌കരണത്തിന് മുതിരുന്നത്. സ്റ്റേഷനുകളിൽനിന്ന് ബസ് നീങ്ങിത്തുടങ്ങുമ്പോൾ യാത്രക്കാരൻ കൈകാണിച്ചാൽബസ് നിർത്തിക്കൊടുക്കണം. സ്ത്രീ യാത്രികർക്ക് രാത്രി ബസുകളിൽ നൽകുന്ന സ്റ്റോപ്പ് ഇളവ് തുടരും. രാത്രി എട്ടിനും രാവിലെ ആറിനും ഇടയ്ക്ക് ആവശ്യപ്പെടുന്നിടത്ത് നിർത്തിക്കൊടുക്കും.
