കണ്ണൂർ :- സംസ്ഥാനത്ത് കഴിഞ്ഞ 2 വർഷങ്ങളിലായി ശുചിത്വ മിഷൻ്റെ ലൈബ്രറി ശുചിമുറി പദ്ധതിപ്രകാരം കൂടുതൽ ഗ്രന്ഥശാലകൾക്കു ശുചിമുറി നൽകിയത് കണ്ണൂർ ജില്ലയിൽ. പദ്ധതി പ്രകാരം ഇതുവരെ 40 ഗ്രാമീണ ഗ്രന്ഥാലയങ്ങൾക്കാണു ജില്ലയിൽ ശുചിമുറി നിർമിച്ചത്. 2 ലക്ഷം രൂപ യൂണിറ്റ് ചെലവിൽ 1,80,000 രൂപ വീതമാണ് ശുചിത്വ മിഷൻ വിഹിതമായി നൽകിയത്. ബാക്കി 20000 രൂപ ഗ്രന്ഥശാല സംഘത്തിന്റെ ധനസഹായമാണ്. ലൈബ്രറി കൗൺസിൽ അംഗീകാരമുള്ളതും സ്വന്തമായി ഭൂമിയുള്ളതുമായ ഗ്രാമീണ ഗ്രന്ഥാലയങ്ങൾക്കാണ് ശുചിമുറി നിർമിക്കാൻ ശുചിത്വമിഷൻ സഹായം നൽകിയത്. പഞ്ചായത്ത് തലത്തിൽ ഗുണഭോക്തൃ സമിതി രൂപീകരിച്ചാണ് ഗ്രന്ഥശാല ശുചിമുറികളുടെ പണി നടത്തിയത്. ഇതിനായി അതത് പഞ്ചായത്തുകൾ പ്രത്യേകമായി പദ്ധതിയും വച്ചു.
ഏറ്റവും കൂടുതൽ ശൗചാലയങ്ങൾ നിർമിച്ചത് എരമം, കുറ്റൂർ, പായം, പരിയാരം പഞ്ചായത്തുകളിലാണ്. 4 വീതം. മലപ്പട്ടം, മയ്യിൽ എന്നിവിടങ്ങളിൽ 3 വീതവും പടിയൂർ, മയ്യിൽ കരിവെള്ളൂർ, കല്ലാശേരി, മാലൂർ, കുറുമാത്തൂർ എന്നിവിടങ്ങളിൽ 2 വീത വുമാണ് ഗ്രന്ഥശാല ശൗചാലയങ്ങൾ നിർമിച്ചത്. ചിറക്കൽ, ഏഴോം, ചെറുകുന്ന്, കോട്ടയം, മാങ്ങാട്ടിടം, മൊകേരി, ചെറുപുഴ, കുറ്റിയാട്ടൂർ, കൂടാളി എന്നീ പഞ്ചായത്തുകളിൽ ഓരോന്നു വീതവും നിർമിച്ചു. ലൈബ്രറി കൗൺസിൽ സഹായത്തോടെയുള്ള പദ്ധതി അവസാനിച്ചെങ്കിലും പൊതുജനങ്ങൾക്ക് കൂടി ഉപയോഗിക്കാവുന്ന രീതിയിലുള്ള ടോയ്‌ലെറ്റ് നിർമ്മിക്കാൻ ധനസഹായം തുടർന്നും ലഭിക്കുമെന്ന് ജില്ലാ ശുചിത്വ മിഷൻ കോർഡിനേറ്റർ കെ.എം സുനിൽകുമാർ അറിയിച്ചു.
