കണ്ണൂർ :- പൊതുമരാമത്ത് വകുപ്പ്, ത്രിതല പഞ്ചായത്തുകൾ എന്നിവ റോഡ് നിർമ്മിക്കുന്ന വേളയിൽ വനാന്തര പാതകളിൽ സ്പീഡ് ബ്രേക്കറുകൾ സ്ഥാപിക്കുന്നതിനുള്ള നടപടി സ്വീകരിക്കാൻ ബന്ധപ്പെട്ട വകുപ്പുകൾക്ക് നിർദ്ദേശം നൽകുമെന്ന് വനംവകുപ്പ് മനുഷ്യാവകാശ കമ്മീഷനെ അറിയിച്ചു. കാട്ടുപോത്തുകളെ കാണുന്ന പ്രദേശങ്ങളിൽ പൊതുജനങ്ങളുടെ ജീവനും സ്വത്തിനും അപകടം ഉണ്ടാകാതിരിക്കാനുള്ള ജാഗ്രത വനം വകുപ്പ് ഉദ്യോഗസ്ഥർ പുലർത്തുമെന്ന് കണ്ണൂർ ഡിവിഷണൽ ഫോറസ്റ്റ് ഓഫീസർ സമർപ്പിച്ച റിപ്പോർട്ടിൽ പറയുന്നു. വന മേഖലയിലുള്ള റോഡുകളിലൂടെ സഞ്ചരിക്കുന്ന വാഹനങ്ങളുടെ വേഗപരിധി കർശനമായി നിയന്ത്രിക്കാൻ നടപടിയെടുക്കണം. ഇവിടങ്ങളിലെ വേഗപരിധി 30 കിലോമീറ്ററാക്കാൻ മോട്ടോർ വെഹിക്കിൾ വകുപ്പ്, പോലീസ്, ത്രിതല പഞ്ചായത്ത് എന്നിവരുടെ സേവനം ലഭ്യമാക്കും. വനത്തിനകത്ത് അനധികൃതമായി പ്രവേശിച്ച് വന്യജീവികളെ പ്രകോപിതരാക്കുന്ന വിധത്തിൽ ഫോട്ടോ എടുക്കുന്നതും പേടിപ്പിക്കുന്നതും തടയും. കാട്ടുപോത്തിന്റെ സാന്നിദ്ധ്യമുള്ള പ്രദേശങ്ങളിൽ വനംവകുപ്പ് മുന്നറിയിപ്പ് ബോർഡ് സ്ഥാപിച്ചിട്ടുണ്ടെന്നും റിപ്പോർട്ടിൽ പറയുന്നു.
കോളയാട്, നിടുംപൊയിൽ, പെരുവ, നരിക്കോട്, വാഴമല, കൊമ്മേരി പ്രദേശങ്ങളിലാണ് കാട്ടുപോത്തുകളെ സാധാരണ കാണാറുള്ളതെന്ന് റിപ്പോർട്ടിൽ പറയുന്നു. കന്നുകാലികളെ വനമേഖലയിലേക്ക് മേയാൻ വിടുന്നതു കാരണമാണ് കാട്ടുപോത്തിന്റെ ആക്രമണം ഉണ്ടാകുന്നത്. ചങ്ങലഗേറ്റ് പെരുവ റോഡിൽ അമിതവേഗതയിൽ വാഹനമോടിച്ചയാളാണ് വളവിൽ കാട്ടുപോത്തിനെ കണ്ട് തെന്നിവീണത്. കുറ്റ്യാടിൽ 98 വയസുകാരൻ മരിച്ചത് കാട്ടുപോത്തിന്റെ കുത്തു കൊണ്ടല്ല. അക്രമകാരി എന്ന് പറയുന്ന കാട്ടുപോത്തിനെ നിരീക്ഷിച്ചതായും അതിനെ ശാന്തമായാണ് കണ്ടതെന്നും റിപ്പോർട്ടിലുണ്ട്. കണ്ണവം വനമേഖലിയിലെ കാട്ടു പോത്തുകൾ കൃഷി നാശം വരുത്തുന്നവയല്ല. ഏറ്റവും കുറവ് കൃഷി നാശംവരുത്തുന്ന വന്യമൃഗങ്ങളിൽ ഒന്നാണ് കാട്ടുപോത്ത്. കണ്ണവം മേഖലയിൽ കാട്ടുപോത്തുകളെ കാണുന്ന സ്ഥലങ്ങൾ വനംമേഖലയായതിനാൽ അവയെ ഇവിടെ നിന്നും തുരത്താനാവില്ലെന്നും റിപ്പോർട്ടിൽ പറയുന്നു. അങ്ങനെ ചെയ്താൽ അവർ അക്രമാസക്തരാവുകയും അപകടകാരികളായി സമീപപ്രദേശങ്ങളിൽ ചിതറിയെത്തുമെന്നും റിപ്പോർട്ടിൽ പറയുന്നു. മുൻകരുതൽ സ്വീകരിക്കുന്നതാണ് ഉചിതമെന്നും റിപ്പോർട്ട് പറയുന്നു. മനുഷ്യാവകാശ പ്രവർത്തകനായ അഡ്വ. വി . ദേവദാസ് സമർപ്പിച്ച പരാതിയിലാണ് നടപടി.
