കണ്ണൂർ :- കാലവർഷം അവസാനമാസത്തിലേക്ക് കടക്കുമ്പോൾ സംസ്ഥാനത്ത് ഇതുവരെ മൂന്ന് ജില്ലകളിലും കേന്ദ്രഭരണ പ്രദേശമായ മാഹിയിലും അധിക മഴ രേഖപ്പെടുത്തി. കണ്ണൂർ (15), പാലക്കാട് (ഒന്ന്), തിരുവനന്തപുരം (11) ശതമാനം വീതമാണ് അധികമഴ. മാഹിയിൽ 19 ശതമാനവും. 2349.7 മില്ലിമീറ്റർ പെയ്യേണ്ട കണ്ണൂരിൽ 2707.7 മില്ലിമീറ്ററും മാഹിയിൽ 2128 മില്ലിമീറ്റർ വേണ്ടിടത്ത് 2522.2 മില്ലിമീറ്ററും 1349.2 മി ല്ലിമീറ്റർ വേണ്ട പാലക്കാട് 1360.4 മില്ലിമീറ്ററും 666.3 മില്ലിമീറ്റർ പെയ്യേണ്ട തിരുവനന്തപുരത്ത് 736 മില്ലിമീറ്ററും മഴയാണ് ജൂൺ ഒന്നു മുതൽ ഓഗസ്റ്റ് 30 വരെ ലഭിച്ചത്. അതേസമയം, സംസ്ഥാനത്ത് മൊത്തത്തിൽ 11 ശതമാനം മഴക്കുറവുണ്ട്. ജൂണിൽ 25 ശത മാനം കുറവ് മഴ ലഭിച്ചപ്പോൾ ജൂലായിൽ 16 ശതമാനം കൂടുതൽ മഴയാണ് ലഭിച്ചത്. എന്നാൽ ഓഗസ്റ്റിൽ 30 ശതമാനം കുറവ് മഴയാണ് ലഭിച്ചത്.
ഉരുൾപൊട്ടലിൽ വിറങ്ങലിച്ച വയനാട്ടിൽ ഇതുവരെ പെയ്ത മഴയുടെ കണക്കിൽ വലിയ കുറവാണ് രേഖപ്പെടുത്തിയിരിക്കുന്നത്-28 ശതമാനം. 2200.9 മില്ലിമീറ്റർ പെയ്യേണ്ട സ്ഥാനത്ത് 1579.8 മില്ലിമീറ്റർ മഴയേ പെയ്തുള്ളൂ. 2203.3 മില്ലിമീറ്റർ പെയ്യേണ്ട ഇടുക്കിയിൽ 1525.3 മില്ലിമീറ്റർ മഴയാണ് (31 ശതമാനം കുറവ്) ഇതുവരെ പെയ്തത്.
എന്നാൽ സെപ്റ്റംബറിൽ കൂടുതൽ മഴ ലഭിക്കാൻ സാധ്യതയുണ്ടെന്നാണ് കേന്ദ്ര കാലാവസ്ഥവകുപ്പിൻ്റെ മുന്നറിയിപ്പ്. ബംഗാൾ ഉൾക്കടലിൽ ന്യൂനമർദം രൂപപ്പെടാനുള്ള സാധ്യതയുണ്ടെന്നും ഇത് കേരളത്തിലെ മധ്യ-തെക്കൻ ജില്ലകളിലെ മഴയെ ശക്തിപ്പെടുത്താൻ സാധ്യതയുണ്ടെന്നാണ് കാലവസ്ഥ വകുപ്പിൻ്റെ നിഗമനം.
