കണ്ണൂർ :- മാലിന്യ സംസ്കരണ മേഖലയിൽ ന്യൂജനറേഷൻ ആശയങ്ങളുമായി കുടുംബശ്രീ ബാലസഭ കുട്ടികൾ. കണ്ണൂർ, കാസർഗോഡ് ജില്ലകളിലെ ബാലസഭകളിൽ നിന്നും തിരഞ്ഞെടുത്ത 19 കുട്ടികളാണ് മാലിന്യ സംസ്കരണവും പ്രശ്നപരിഹാരവും എന്ന വിഷയത്തിലുള്ള പ്രബന്ധങ്ങളുടെ അവതരണം നടത്തിയത്. ശുചിത്വോത്സവം രണ്ടാം സീസണിന്റെ ഭാഗമായി മാലിന്യ സംസ്ക്‌കരണ മേഖലയിൽ പുതിയമാതൃകകൾ ഉണ്ടാക്കുക എന്ന ലക്ഷ്യത്തോടെ വാർഡ് തലത്തിൽ വിവിധ പരിപാടികൾ ബാലസഭ നടത്തിയിരുന്നു.
കാസർഗോഡ് ജില്ലയിലെ ബെഡടുക്ക പഞ്ചായത്തിലെ വിനോദ സഞ്ചാരകേന്ദ്രങ്ങളിലെ മാലിന്യ പ്രശ്‌നങ്ങൾ, മട്ടന്നൂർ നഗരസഭ പരിധിയിൽ വരുന്ന വിദ്യാലയങ്ങളിലെ മാലിന്യ സംസ്കരണം, സാനിറ്ററി മാലിന്യ സംസ്കരണം തുടങ്ങി വാഹനങ്ങളുടെ പുക മാലിന്യങ്ങൾ കുറയ്ക്കുന്നതിനുള്ള കാര്യങ്ങൾ വരെ കുട്ടികൾ അവതരിപ്പിച്ചു. SCERT റിസർച് ഓഫിസർ ഡോ.ടി.വി വിനീഷ്, തിരുവനന്തപുരം ഡയറ്റ് ലക്ചറർ ഡോ.സതീഷ് ചന്ദ്രൻ, സംസ്‌ഥാന മിഷൻ പാനൽ അംഗവും എസ്.ബൈജു കുമാർ, ഹയർ സെക്കൻഡറി അധ്യാപകൻ എ.ഗിരീഷ് എന്നിവർ പ്രബന്ധങ്ങൾ വിലയിരുത്തി.
