മയ്യിൽ :- കൂൾ റൂഫ്‌ സാങ്കേതിക വിദ്യയിലൂടെ കെട്ടിടങ്ങൾക്കകത്തെ ചൂട്‌ കുറക്കുന്നതിനായി എനർജി മാനേജ്‌മെന്റ്‌ സെന്റർ കേരളയും തായംപൊയിൽ സഫ്‌ദർ ഹാഷ്‌മി സ്‌മാരക ഗ്രന്ഥാലയവും സംഘടിപ്പിക്കുന്ന പ്രചാരണ ക്യാമ്പയിൻ ‘കുളിർമ’യ്‌ക്ക്‌ വെള്ളിയാഴ്‌ച തുടക്കമാവും. തായംപൊയിൽ സഫ്‌ദർ ഹാഷ്‌മി സ്‌മാരക ഗ്രന്ഥാലയത്തിൽ ഏപ്രിൽ 18 വെള്ളിയാഴ്‌ച വൈകുന്നേരം 4 മണിക്കാണ് പരിപാടി.
തളിപ്പറമ്പ്‌ മണ്ഡലത്തിൽ ഇഎംസി റിസോഴ്‌സ്‌ പേഴ്‌സൺ വി.വി ഗോവിന്ദൻ, നാഷണൽ സർവീസ്‌ സ്‌കീം ക്ലസ്‌റ്റർ കൺവീനർ സി.വി ഹരീഷ്‌ കുമാർ എന്നിവർ വിഷയാവതരണം നടത്തും. ഓപ്പൺ ടു ഓൾ വിഭാഗത്തിൽ തത്സമയ ക്വസ്‌ മത്സരവുമുണ്ടാകും. ഏപ്രിൽ 27ന്‌ വൈകിട്ട്‌ നാലിന്‌ ചെങ്ങൽ എകെജി സ്‌മാരക ഗ്രന്ഥാലയം, ഏപ്രിൽ 28ന്‌ വൈകിട്ട്‌ നാലിന്‌ വളപട്ടണം ഗ്രാമപഞ്ചായത്ത്‌ ലൈബ്രറി എന്നിവിടങ്ങളിലും ക്യാമ്പയിൻ സംഘടിപ്പിക്കും.
കെട്ടിടങ്ങൾക്കുള്ളിലെ ചൂട്‌ കുറച്ച്‌ എയർകണ്ടീഷനറുകൾ, ഫാനുകൾ എന്നിവയുടെ ഉപയോഗം പരിമിതമാക്കുന്നതിലൂടെ വൈദ്യുതി ഉപയോഗം കുറക്കുകയാണ്‌ ക്യാമ്പയിന്റെ ലക്ഷ്യം. തളിപ്പറമ്പ്‌, കല്യാശേരി, അഴിക്കോട്‌ മണ്ഡലങ്ങളിൽ തെരഞ്ഞെടുക്കപ്പെട്ട കേന്ദ്രങ്ങളിൽ സെമിനാർ നടക്കും. കേരള സംസ്ഥാന കാലാവസ്ഥ വ്യതിയാന നിയന്ത്രണ ദൗത്യം, ബ്യൂറോ ഓഫ്‌ എനർജി എഫിഷ്യൻസി, കേരള സംസ്ഥാന ദുരന്തനിവാരണ അതോറിറ്റി എന്നിവയുടെ സഹകരണത്തോടെയാണ്‌ ക്യാമ്പയിൻ.
