കണ്ണൂർ :- സംസ്ഥാന സഹകരണ പെൻഷൻ ബോർഡ് മുഖേന പെൻഷൻ വാങ്ങുന്നവരുടെ മസ്റ്ററിംഗ് ജീവൻരേഖ സംവിധാനം വഴി ആധാർ അധിഷ്ഠിത ബയോമെട്രിക്കിലേക്ക് മാറുന്നു. ഇതോടെ വർഷംതോറും ലൈഫ് സർട്ടിഫിക്കറ്റ് നൽകിവരുന്ന രീതി മാറി ലളിതമായ രീതിയിൽ പെൻഷൻകാർക്ക് മസ്റ്ററിംഗ് നടത്താൻ സാധിക്കും. മസ്റ്ററിംഗ് ആധാർ അധിഷ്ഠിത ബയോമെട്രിക്കിലേക്ക് മാറുന്നതിന്റെ സംസ്ഥാനതല ഉദ്ഘാടനം ജൂലൈ 30 ബുധനാഴ്ച വൈകുന്നേരം മൂന്നിന് ജവഹർ സഹകരണ ഭവനിൽ സഹകരണ-ദേവസ്വം-തുറമുഖ വകുപ്പ് മന്ത്രി വി.എൻ. വാസവൻ നിർവ്വഹിക്കും.
ബോർഡിന്റെ സേവനങ്ങൾ പൂർണ്ണമായും ഇ-ഓഫീസിലേക്ക് മാറുന്നതിന്റെ ഉദ്ഘാടനം പൊതുവിദ്യാഭ്യാസ-തൊഴിൽ വകുപ്പ് മന്ത്രി വി. ശിവൻകുട്ടി നിർവ്വഹിക്കും. 27,000 വരുന്ന പെൻഷൻകാരിൽ ഏറ്റവും മുതിർന്ന പെൻഷൻകാരെ ഭക്ഷ്യ-സിവിൽ സപ്ലൈസ് വകുപ്പ് മന്ത്രി ജി.ആർ. അനിൽ ആദരിക്കും. പ്രമുഖ സഹകാരികളും, ട്രേഡ് യൂണിയൻ നേതാക്കളും സഹകരണ പെൻഷൻകാരും പരിപാടിയിൽ പങ്കെടുക്കുമെന്ന് പെൻഷൻ ബോർഡ് അഡീഷണൽ രജിസ്ട്രാർ/സെക്രട്ടറി അറിയിച്ചു.
