കണ്ണൂര്‍ :- മുന്‍സിപ്പല്‍ കോര്‍പ്പറേഷന്റെ ജല ബജറ്റ് മേയര്‍ മുസ്ലിഹ് മഠത്തില്‍ ഹരിത കേരള മിഷന്‍ ജില്ലാ കോ ഓര്‍ഡിനേറ്റര്‍ ഇ.കെ സോമശേഖരനു നല്‍കി പ്രകാശനം ചെയ്തു. സംസ്ഥാന സര്‍ക്കാരിന്റെ നവകേരളം കര്‍മപദ്ധതിയുടെ ഭാഗമായി ഹരിത കേരള മിഷന്റെ നേതൃത്വത്തിലാണ് ജല ബജറ്റ് തയ്യാറാക്കിയത്. ഒരു പ്രദേശത്തിന്റെ ജലലഭ്യതയും ജലവിനിയോഗവും അടിസ്ഥാനമാക്കി തയ്യാറാക്കുന്ന ആധികാരിക രേഖയാണ് ജല ബജറ്റ്. ഓരോ ചെറു പ്രദേശത്തും ഒരു ചെറുകാലയളവില്‍ പെയ്യുന്ന മഴ ലഭ്യതയും അവിടെ വിവിധ ആവശ്യങ്ങള്‍ നിറവേറ്റുന്നതിന് വേണ്ട ജലത്തിന്റെ അളവും താരതമ്യം ചെയ്ത്,
ഓരോ സമയത്തും ജലമിച്ചമാണോ ജലക്കമ്മിയാണോ അനുഭവപ്പെടുന്നത് എന്ന് കണ്ടെത്തുന്ന പ്രവര്‍ത്തനമാണ് ജല ബജറ്റിലൂടെ ചെയ്യുന്നത്. നിലവില്‍ ഭൂഗര്‍ഭ ജല വിനിയോഗത്തില്‍ സെമി ക്രിട്ടിക്കല്‍ തലത്തില്‍ നില്‍ക്കുന്ന കോര്പ്പറേഷന് ഈ ജല ബജറ്റിന്റെ തുടര്‍ പ്രവര്‍ത്തനങ്ങള്‍ ഏറ്റെടുത്തു നടത്തുന്നതു വഴി നിലവിലെ അവസ്ഥ മെച്ചപ്പെടുത്തി സുരക്ഷിതമായ തലത്തിലേക്ക് ഉയരാന്‍ സാധിക്കും. കേരളത്തിലെ നീര്‍ത്തട സംരക്ഷണ പദ്ധതികള്‍ക്ക് മാതൃകയായ കാനാമ്പുഴ പുനരുജ്ജീവനം പദ്ധതിയിലെ ജനകീയ പ്രവര്‍ത്തനങ്ങള്‍ ജല ബജറ്റിന്റെ പ്രധാന ഭാഗമാണ്. കോര്‍പ്പറേഷന്റെ വരുംകാല ജല സുരക്ഷാ കര്‍മ പദ്ധതികളിലേക്കുള്ള ശ്രമങ്ങള്‍ക്ക് കരുത്ത് പകര്‍ന്ന് വികസന ലക്ഷ്യം കൈവരിക്കുന്നതിനുള്ള പ്രവര്‍ത്തനങ്ങള്‍ക്ക് ജല ബജറ്റ് പ്രയോജനപ്പെടും.
