തിരുവനന്തപുരം :- ഡ്രൈവിങ് പരിശീലിപ്പിക്കുമ്പോൾ കാൽനടക്കാരുടെ സുരക്ഷ സംബന്ധിച്ച പാഠങ്ങൾ ശരിയായി പഠിപ്പിച്ചില്ലെങ്കിൽ ഡ്രൈവിങ് സ്കൂളുകൾ കുടുങ്ങും. കാൽനടക്കാരുടെ സുരക്ഷ ഉറപ്പാക്കാനുള്ള പരിശീലനം നൽകുന്നുണ്ടോയെന്ന് ഉറപ്പാക്കാൻ മോട്ടർ വാഹന വകുപ്പിന് ഗതാഗത കമ്മിഷണർ സി.എച്ച് നാഗരാജു നിർദേശം നൽകി. ഡ്രൈവിങ് ടെസ്റ്റ‌് നടത്തുമ്പോൾ, കാൽനടയാത്രക്കാരുടെ സുരക്ഷ ഉറപ്പാക്കാൻ നിയമത്തിൽ നിർദേശിക്കുന്ന 4 നിബന്ധനകളിൽ ഓരോ അപേക്ഷകന്റെയും കഴിവു വിലയിരുത്തിയ ശേഷം മാത്രമേ ലൈസൻസ് നൽകാൻ പാടുള്ളൂ.
കാൽനടക്കാർക്ക് റോഡ് കുറുകെ കടക്കാനുള്ള സീബ്ര ക്രോസിങ്ങിൽ ആളുണ്ടെങ്കിൽ ക്രോസിങ്ങിന് 3 മീറ്റർ മുൻപ് വാഹനം നിർത്തിക്കൊടുക്കണം. സീബ്ര ക്രോസിങ്ങിനു 3 മീറ്റർ മുൻപുള്ള വെള്ളവര ക്രോസ് ചെയ്യാതെയാകണം വാഹനം നിർത്തേണ്ടത്. ഈ വെള്ളവര കടന്നും ക്രോസിങ്ങിലേക്കു കയറ്റിയും വാഹനം നിർത്തുന്നവരുടെയും വാഹനം പാർക്ക് ചെയ്‌തു പോകുന്നവരുടെയും ലൈസൻസ് റദ്ദാക്കാനും 2000 രൂപ വരെ പിഴ ഈടാക്കാനും കമ്മിഷണർ നിർദേശം നൽകിയിരുന്നു. നടപ്പാത കയ്യേറി വാഹനം പാർക്ക് ചെയ്യുന്നവർക്കെതിരെയും നടപടിയെടുക്കും.
