കൊല്ലം :- ശബരിമല ഡ്യൂട്ടിക്കിടെയുണ്ടായ വാഹനാപകടത്തിൽ ഫയർ ഫോഴ്സ് ഉദ്യോഗസ്ഥൻ മരിച്ചു. ആയൂർ സ്വദേശി ആർ രഞ്ജിത് കുമാർ ആണ് (39) മരിച്ചത്. ശബരിമല തീർത്ഥാടനവുമായി ബന്ധപ്പെട്ട് ഡ്യൂട്ടിയിലായിരുന്ന രഞ്ജിത് കുമാർ സഞ്ചരിച്ചിരുന്ന അഗ്നിരക്ഷാവാഹനം നിയന്ത്രണം വിട്ട് മറിഞ്ഞാണ് അപകടമുണ്ടായത്. തമിഴ്നാട്ടിൽ നിന്ന് ശബരിമല ദർശനത്തിനെത്തിയ തീർഥാടകരുടെ, റോഡരികിൽ പാർക്ക് ചെയ്തിരുന്ന വാഹനങ്ങളിലേക്ക് ഇടിച്ചു കയറിയാണ് വാഹനം മറിഞ്ഞത്. കൂടാതെ വനം വകുപ്പിന്റെ്റെ വാഹനത്തിലും മറ്റൊരു ജീപ്പിലും ഫയർഫോഴ്സ് വാഹനം ഇടിച്ചു. വാഹനം പൂർണമായും തകർന്നു.
അപകട സമയത്ത് പാർക്ക് ചെയ്തിരുന്ന വാഹനങ്ങളിൽ ആളുകൾ ഇല്ലാതിരുന്നതിനാൽ വലിയ ദുരന്തം ഒഴിവായി. രഞ്ജിത്തിന്റെ ഒപ്പം ഉണ്ടായിരുന്ന ആലപ്പുഴ ഫയർ സ്റ്റേഷനിലെ ഡ്രൈവർ അഭിലാഷ് ഉൾപ്പടെയുള്ളവർ ആശുപത്രിയിൽ ചികിത്സയിലാണ്. അഗ്നിരക്ഷാ സേനയുടെ തിരുവല്ല യൂണിറ്റിലെ ജീവനക്കാരനായ രഞ്ജിത് മൂന്നു ദിവസം മുമ്പാണ് നിലയ്ക്കലിലെ താൽകാലിക സ്റ്റേഷനിൽ ഡ്യൂട്ടിക്ക് എത്തിയത്. നിരവധി പേരെ അപകടങ്ങളിൽ നിന്നും രക്ഷപ്പെടുത്തിയിട്ടുള്ള മികച്ച ഒരു ഫയർ ഫോഴ്സ് ഉദ്യോഗസ്ഥനെയാണ് നാടിന് നഷ്ടമായത്.
