കണ്ണൂർ :- അതിശക്തമായ മഴ ഉണ്ടാകുന്ന സാഹചര്യത്തിൽ വിദ്യാഭ്യാസ സ്ഥാപനങ്ങൾക്ക് അവധി നൽകേണ്ടി വരുന്ന സാഹചര്യം ഉണ്ടായാൽ ബന്ധപ്പെട്ട തഹസിൽദാർമാരും ഡിഇഒമാരും റിപ്പോർട്ട് ചെയ്യുന്നതിന്റെ അടിസ്ഥാനത്തിൽ ജില്ലാ കലക്ടർ ദുരന്ത നിവാരണ നിയമം 2005 പ്രകാരം അവധി പ്രഖ്യാപിക്കാൻ തീരുമാനം.
തദ്ദേശ സ്വയംഭരണ-എക്സൈസ് വകുപ്പ് മന്ത്രി എം വി ഗോവിന്ദൻ മാസ്റ്ററുടെ അധ്യക്ഷതയിൽ ചേർന്ന ജില്ലാ ദുരന്ത നിവാരണ അതോറിറ്റി യോഗത്തിലാണ് തീരുമാനമെടുത്തത്.
അവധി നൽകേണ്ട സാഹചര്യം ഉണ്ടായാൽ ബന്ധപ്പെട്ട ഡിഇഒമാരും തഹസിൽദാർമാരും തലേദിവസം വൈകുന്നേരം ഏഴ് മണിക്ക് മുമ്പായി വിവരം ജില്ലാ കലക്ടറെ നേരിട്ട് അറിയിക്കണം.
വിദ്യാലയ അവധി പ്രാദേശികമായി നൽകും.കാലവർഷത്തെ തുടർന്ന് വിദ്യാലയങ്ങൾക്ക് അവധി നൽകേണ്ട സാഹചര്യത്തിൽ അക്കാര്യം പ്രാദേശിക സാഹചര്യം കണക്കിലെടുത്ത് തീരുമാനിക്കാനും മന്ത്രി എം വി ഗോവിന്ദൻ മാസ്റ്ററുടെ അധ്യക്ഷതയിൽ ചേർന്ന ജില്ലാ തല അവലോകന യോഗത്തിൽ ധാരണയായി.
ഓരോ പ്രദേശത്തെയും മഴയുടെ തീവ്രതയും വെള്ളക്കെട്ട് അടക്കമുള്ള ഘടകങ്ങളും പരിശോധിച്ച് തദ്ദേശസ്ഥാപനങ്ങളും ബന്ധപ്പെട്ട എഇഒമാരുമായും ആലോചിച്ച് വിദ്യാഭ്യാസ വകുപ്പ് ഉപ ഡയറക്ടറായിരിക്കും അവധി തീരുമാനിക്കുക. തലേദിവസം വൈകിട്ട് തന്നെ അവധി തീരുമാനമെടുക്കുകയും ഇത് ഔദ്യോഗികമായി ജില്ലാ ഇൻഫർമേഷൻ ഓഫീസ് വഴി മാധ്യമങ്ങളെ അറിയിക്കുകയും വേണം.
