നാറാത്ത്:-2021-22 അധ്യയന വര്‍ഷം സിബിഎസ്ഇ നടത്തിയ പത്താം ക്ലാസ്സ് പരീക്ഷയില്‍ ദേശീയ തലത്തില്‍ നാലാം സ്ഥാനവും കണ്ണൂര്‍ സഹോദയയില്‍ ഒന്നാം സ്ഥാനവും നേടി പാമ്പുരുത്തി സ്വദേശിനിയായ വിദ്യാര്‍ഥിനി. പാമ്പുരുത്തിയിലെ സുമയ്യാസില്‍ ബിസിനസ്സുകാരനായ ഷംസുദ്ദീന്റെയും അധ്യാപികയായ സുമയ്യയുടെയും മകള്‍ ഷംഹാന ശംസാണ് മികവ് തെളിയിച്ചത്. സഹോദയ നടത്തിയ വിവിധ മത്സരങ്ങളില്‍ ഷംഹാന മികച്ച പ്രകടനം കാഴ്ചവെച്ചിട്ടുണ്ട്. പ്രൈമറി തലം മുതല്‍ കണ്ണൂർ റിംസ് സ്‌കൂളിലെ വിദ്യാര്‍ത്ഥിനിയായ ഷംഹാനയുടെ സ്ഥിരോത്സാഹത്തിനും കഠിന പ്രയത്‌നത്തിനുള്ള അംഗീകാരമാണ് നേട്ടമെന്ന് അധ്യാപകര്‍ കണ്ണൂര്‍ പ്രസ് ക്ലബ്ബില്‍ നടത്തിയ വാര്‍ത്താസമ്മേളനത്തില്‍ പറഞ്ഞു. വാര്‍ത്താ സമ്മേളനത്തില്‍ റിംസ് സ്‌കൂള്‍ സീനിയര്‍ പ്രിന്‍സിപ്പല്‍ ഐ.വി. ജനാര്‍ദ്ദനന്‍, പ്രിന്‍സിപ്പല്‍ സറീന രാകേഷ്, ഹെഡ്മിസ്ട്രസ് സ്വപ്ന വത്സരാജ്, കുട്ടിയുടെ പിതാവ് ഷംസുദ്ദീന്‍ എന്നിവര്‍ പങ്കെടുത്തു.
