കണ്ണൂര്‍:-സാങ്കേതിക തകരാര്‍ മൂലം കാസര്‍കോട്- തിരുവനന്തപുരം വന്ദേഭാരത് എക്‌സ്പ്രസിന്റെ യാത്ര ഒന്നര മണിക്കൂറോളം വൈകി. വൈകിട്ട് മൂന്നരക്ക് ട്രെയിന്‍ കണ്ണൂരില്‍ എത്തിയപ്പോളാണ് സാങ്കേതിക തകരാര്‍ ശ്രദ്ധയില്‍ പെട്ടത്.
തുടര്‍ന്ന് ഒന്നര മണിക്കൂറോളം കണ്ണൂര്‍ സ്‌റ്റേഷനില്‍ നിര്‍ത്തിയിട്ട ട്രെയിന്‍ 5 മണിയോടെ ആണ് യാത്ര പുനരാരംഭിച്ചത്. കമ്പ്രസര്‍ തകരാര്‍ കാരണമാണ് ട്രെയിനിന്റെ യാത്ര വൈകിയത് എന്നാണ് പ്രാഥമിക വിവരം.
ഇത് കാരണം ട്രെയിനില്‍ എ.സിയും പ്രവര്‍ത്തിച്ചില്ല. പ്രയാസത്തിലായ യാത്രക്കാരെല്ലാം ഇതോടെ ട്രെയിനില്‍ നിന്നിറങ്ങി പ്ലാറ്റ്‌ഫോമില്‍ നില്‍ക്കുക ആയിരുന്നു.
ഉച്ചയ്ക്ക് രണ്ടരക്ക് കാസര്‍കോട് നിന്ന് പുറപ്പെട്ട ട്രെയിന്‍ ഒടുവില്‍ തകരാര്‍ പരിഹരിച്ച ശേഷം വൈകിട്ട് 5 മണിയോടെ ആണ് കണ്ണൂരില്‍ നിന്ന് യാത്ര പുനരാരംഭിച്ചത്.
