കരിങ്കൽക്കുഴി : കെഎസ് & എസിയുടെ 48 മത് വാർഷികവും കരിങ്കൽക്കുഴി വനിതാ വേദിയുടെ മുപ്പതാം വാർഷികവും ജനുവരി മാസം മുതൽ നടന്നുവരുന്ന നാട്ടുത്സവം സമാപിച്ചു. ഗാനോത്സവം, ചിത്രോത്സവം, ചലച്ചിത്രോത്സവം, കായികോത്സവം, സാഹിത്യോത്സവം, നൃത്തോത്സവം എന്നീ പരിപാടികളാണ് ഇതിൻറെ ഭാഗമായി സംഘടിപ്പിച്ചത് . കൊളച്ചേരിയുടെ നാടകാചാര്യനും ഇറ്റാക്സ് കോളേജ് സ്ഥാപകനും കെ എസ് ആൻഡ് എസിയുടെ രക്ഷാധികാരിയും ആയ അടുത്തയിടെ അന്തരിച്ച ചന്ദ്രൻ തെക്കയിലിന്റെ നാമധേയത്തിൽ നണിയൂർ എ.എൽ.പി സ്കൂൾ ഓഡിറ്റോറിയത്തിൽ പ്രത്യേകം ഒരുക്കിയ വേദിയിൽ സമാപന പരിപാടി അരങ്ങേറി .പ്രശസ്ത കവിയും ഗാനരചയിതാവും സാംസ്കാരിക പ്രവർത്തകനുമായ എം.എം സചീന്ദ്രൻ ഉദ്ഘാടനം ചെയ്തു. സ്വാഗതസംഘം ചെയർമാൻ കെ.വി ശശീന്ദ്രൻ അധ്യക്ഷത വഹിച്ചു. കൊളച്ചേരി ഗ്രാമപഞ്ചായത്ത് വൈസ് പ്രസിഡന്റ് എം. സജിമ സമ്മാനവിതരണം നിർവഹിച്ചു.
കെ എസ് & എ സി യുടെയും വനിതാവേദിയുടെയും ആദ്യകാല സാരഥികളെ ചടങ്ങിൽ ഗ്രാമപഞ്ചായത്ത് മെമ്പർ കെ.പി നാരായണൻ ആദരിച്ചു. വി.വി ശ്രീനിവാസൻ, ഭാസ്കരൻ.പി നണിയൂർ തുടങ്ങിയവർ സംസാരിച്ചു. തുടർന്ന് ദർപ്പണ സ്കൂൾ ഓഫ് ആർട്സ് അണിയിച്ചൊരുക്കിയ നൃത്തോത്സവം നടന്നു. തോമസ് കേളംകൂർ രചനയും രവി ഏഴോം സംവിധാനവും നിർവഹിച്ച കെ എസ് ആൻഡ് എസി യുടെ പുതിയ നാടകം 'പരിപാവനമായ ഒരു അസംബന്ധം അവതരിപ്പിച്ചു .തുടർന്ന് വിവിധ കലാരൂപങ്ങളെ കോർത്തിണക്കി 60 ഓളം പേർ അണിനിരന്ന ഫ്യൂഷൻ ഡാൻസ് അരങ്ങേറി. പി.എം അരുൺകുമാർ സ്വാഗതവും ഷൈനി പി.വി നന്ദിയും പറഞ്ഞു.
