.jpg)
എരുമേലി :- അമ്പലപ്പുഴ, ആലങ്ങാട് സംഘങ്ങളുടെ എരുമേലി പേട്ടതുള്ളൽ നാളെ ജനുവരി 12 വെള്ളിയാഴ്ച നടക്കും. അമ്പലപ്പുഴ സംഘമാണ് ആദ്യം പേട്ടതുള്ളുന്നത്. ഉച്ചയ്ക്ക് മുമ്പായി പേട്ട ശാസ്താക്ഷേത്രത്തിൽ നിന്ന് തുടങ്ങും. പേട്ടതുള്ളി മസ്‌ജിദിലെത്തുന്ന അമ്പലപ്പുഴ സംഘത്തെ ജമാ അത്ത് കമ്മിറ്റി പ്രതിനിധികൾ സ്വീകരിക്കും. വാവരു സ്വാമിയുടെ പ്രതിനിധിയെ ഒപ്പം കൂട്ടിയാണ് അമ്പലപ്പുഴ പേട്ടതുള്ളൽ ധർമശാസ്താ ക്ഷേത്രത്തിലെത്തുന്നത്.
പേട്ടതുള്ളലിന് ഐക്യദാർഢ്യവുമായി എരുമേലി മഹല്ല് മുസ്‌ലിം ജമാ അത്ത് കമ്മിറ്റിയുടെ നേതൃത്വത്തിൽ ചന്ദനക്കുടം ഘോഷയാത്ര വ്യാഴാഴ്ച നടക്കും. വ്യാഴാഴ്ച ചന്ദനക്കുടം ഘോഷയാത്രയ്ക്ക് മുന്നോടിയായി നാലിന് നൈനാർ മസ്‌ജിദ് ഓഡിറ്റോറിയത്തിൽ അമ്പലപ്പുഴ പേട്ടതുള്ളൽ സംഘവും ജമാ അത്ത് പ്രതിനിധികളും മത-സാമുദായിക നേതാക്കളും സൗഹൃദ സമ്മേളനവും നടത്തും. വൈകീട്ട് 6.15-ന്, ഘോഷയാത്രയുടെ ഭാഗമായുള്ള സമ്മേളനം മന്ത്രി കെ.രാധാകൃഷ്ണൻ ഉദ്ഘാടനം ചെയ്യും. ജമാ അത്ത് കമ്മിറ്റി പ്രസിഡന്റ് പി.എ ഇർഷാദ് അധ്യക്ഷത വഹിക്കും.
