കൊച്ചി :- കാലാവധികഴിഞ്ഞ് ഒരു വർഷം കഴിഞ്ഞാണ് ഡ്രൈവിങ് ലൈസൻസ് പുതുക്കാൻ അപക്ഷ നൽകുന്നതെങ്കിൽ വീണ്ടും ഡ്രൈവിങ് ടെസ്റ്റ് പാസാകണമെന്ന് ഹൈക്കോടതി. ഇക്കാര്യത്തിൽ മോട്ടോർ വാഹനവകുപ്പ് മുൻപ് പുറപ്പെടുവിച്ച സർക്കുലർ ചോദ്യം ചെയ്ത് എറണാകുളം സ്വദേശി സെബാസ്റ്റ്യൻ ജേക്കബ് നൽകിയ ഹർജി തള്ളിയാണ് ജസ്റ്റിസ് എൻ.നഗരേഷിന്റെ ഉത്തരവ്. 2020 ഒക്ടോബർ 30-ന് ഹർജിക്കാരന്റെ ലൈസൻസ് കാലാവധി കഴിഞ്ഞിരുന്നു. കോവിഡ് കാരണം യഥാസമയം പുതുക്കാനായില്ല. വിദേശത്തു നിന്ന് 2022 ജൂലായ് 15-ന് മടങ്ങിവന്ന ശേഷം ലൈസൻസ് പുതുക്കാൻ അപേക്ഷ നൽകി.
ജോയിന്റ് ആർ.ടി.ഒ 2032 വരെ കാലാവധി നിശ്ചയിച്ച് ലൈസൻസ് പുതുക്കി നൽകി. എന്നാൽ സ്മാർട്ട് കാർഡിനായി അപേക്ഷിച്ചപ്പോൾ ഏഴു ദിവസത്തിനുളളിൽ ജോയിന്റ് ആർ.ടി.ഒ യ്ക്ക് മുമ്പാകെ ഹാജരാകാൻ നോട്ടീസ് ലഭിച്ചു. ലൈസൻസ് പുതുക്കാൻ ഡ്രൈവിങ് ടെസ്റ്റ് നടത്തിയില്ലെന്ന കാരണത്താലായിരുന്നു നോട്ടീസ് ലഭിച്ചത്.
2019-ലെ സർക്കുലർ പ്രകാരം ലൈസൻസ് കാലാവധി കഴിഞ്ഞ് ഒരു വർഷം കഴിഞ്ഞ് പുതുക്കാൻ അപേക്ഷ നൽകുന്നവർ ഡ്രൈവിങ് ടെസ്റ്റടക്കമുള്ള റോഡ് ടെസ്റ്റ് വീണ്ടും പാസാകണമെന്ന് പറയുന്നുണ്ട്. എന്നാൽ ഡ്രൈവിങ് ലൈസൻസ് കാലാവധി കഴിഞ്ഞ് അഞ്ചു വർഷത്തിനുള്ളിൽ പുതുക്കാനായി അപേക്ഷ നൽകിയാൽ ഡ്രൈവിങ് ടെസ്റ്റ് നടത്തേണ്ടതില്ലെന്നാണ് മോട്ടോർ വെഹിക്കിൾ നിയമത്തിൽ പറയുന്നതെന്നായിരുന്നു ഹർജിക്കാരൻ്റെ വാദം.മോട്ടോർ വാഹന നിയമത്തിൽ 2019-ൽ കൊണ്ടുവന്ന ഭേദഗതി പ്രകാരം കാലാവധി കഴിഞ്ഞ് ഒരുവർഷം കഴിഞ്ഞ ലൈസൻസ് പുതുക്കാൻ വീണ്ടും ഡ്രൈവിങ് ടെസ്റ്റ് പാസാകേണ്ടതുണ്ടെന്ന് കോടതി പറഞ്ഞു. ഇക്കാര്യത്തിൽ മോട്ടോർ വാഹന വകുപ്പ് പുറപ്പെടുവിച്ച സർക്കുലറിൽ അപാകമില്ലെന്നും കോടതി വിലയിരുത്തി.
