തിരുവനന്തപുരം :- സംസ്ഥാനത്ത് വാട്ടർ ചാർജ് കൂട്ടുന്നത് സംബന്ധിച്ച് നിലവിൽ ഒരു നിർ ദേശവും പരിഗണനയിൽ ഇല്ലെന്നും തീരുമാനമെടുത്തിട്ടില്ലെന്നും ജലഅതോറിറ്റി. വാട്ടർ ചാർജ് വർധിപ്പിക്കില്ലെന്ന് മന്ത്രി റോഷി അഗസ്റ്റിൻ നിയമസഭയിൽ വ്യക്തമാക്കിയിരുന്നതായും അധികൃതർ പറഞ്ഞു. കടമെടുപ്പു പരിധി ഉയർത്തുന്നതിനായി കേന്ദ്ര സർക്കാർ മുന്നോട്ടു വച്ച വ്യവസ്‌ഥ പ്രകാരം 2021 ഏപ്രിൽ മുതൽ അടിസ്‌ഥാന താരിഫിൽ 5% വർധന സംസ്ഥാനത്ത് നടപ്പാക്കിയിരുന്നു. ഓരോ വർഷവും ഇതു തുടരണമെന്നാണു കേന്ദ്ര നിർദേശം. ഇതുപ്രകാരം ഇന്നു മുതലാണ് നിരക്കുകൾ കൂട്ടേണ്ടിയിരുന്നത്.
നിരക്കു വർധനയെക്കുറിച്ചു സംസ്ഥാന ജലവിഭവ വകുപ്പ് ഇതുവരെ കേന്ദ്ര സർക്കാരിനു കത്തു നൽകിയിട്ടില്ല. പെരുമാറ്റച്ചട്ടം നിലവിലുള്ളതിന്റെ പേരിലാണു സർക്കാർ തീരുമാനമെടുക്കാത്തതെന്നും സൂചനയുണ്ട്. കഴിഞ്ഞ വർഷം ഏപ്രിലിൽ സംസ്ഥാനത്ത് 5% നിരക്കു വർധന വരുത്തേണ്ടതായിരുന്നു. ഫെബ്രുവരിയിൽ വാട്ടർ ചാർജ് ലീറ്ററിന് ഒരു പൈസ കൂട്ടിയതിനാൽ ഏപ്രിലിലെ വർധന വേണ്ടെന്നു വച്ചു.
