കൊട്ടിയൂരിൽ നാളെ വാളാട്ടം

കൊട്ടിയൂർ :- കൊട്ടിയൂരിൽ നാളെ വാളാട്ടം.  ഞായറാഴ്ച പതിവ് പൂജകൾക്കുശേഷം അത്തം ചതുശ്ശതം (വലിയ വട്ടളം പായസം) പെരുമാൾക്ക് നിവേദിക്കും. തുടർന്ന് ഉച്ചശീവേലിക്കുശേഷം ഏഴില്ലക്കാർ സ്വയംഭൂവിഗ്രഹത്തിൽ നിന്ന് ഉത്സവകാലത്ത് കൊട്ടിയൂരിലെത്തിച്ച ദേവതകളെയെല്ലാം തിരികെ ആവാഹിച്ച് വാളുകളിൽ ലയിപ്പിക്കുന്ന വാളാട്ടം നടക്കും. തുടർന്ന് കുടിപതികളുടെ തേങ്ങയേറ്.

ആയിരംകുടം അഭിഷേകത്തിന് മുൻപായി മണിത്തറയിലെ പൂജകൾ അവസാനി പ്പിച്ച് ക്ഷേത്രത്തിൻ്റെ അഗ്നികോണിലെ കലശമണ്ഡപത്തിൽ കലശപൂജയ്ക്കുള്ള ഒരുക്കങ്ങൾ നടത്തും. നിത്യപൂജകൾക്കു ശേഷം ഞായറാഴ്ച രാത്രി തുടങ്ങുന്ന കലശപൂജ തിങ്കളാഴ്ച പുലർച്ചെവരെ നീളും. തിങ്കളാഴ്ച തൃക്കലശാട്ടത്തോടെ കൊട്ടിയൂർ വൈശാഖോത്സവത്തിന് സമാപനമാവും.