കണ്ണൂർ :- മറ്റു മീനുകൾക്കെല്ലാം വില ലഭ്യത തുടരുന്നതിനിടെ ജില്ലയിൽ ചെമ്മീൻ ലഭ്യത കൂടി. ആയിക്കരഹാർബറിൽ ഇന്നലെ കിലോയ്ക്കു 150 രൂപയ്ക്കാണ് ഇടത്തരം ചെമ്മീൻ വിൽപന നടത്തിയത്. കിലോയ്ക്ക് 300-400 രൂപവരെയും ചെമ്മീൻ വിൽപന നടന്നു. കഴിഞ്ഞ 3 ദിവസമായി വൻതോതിൽ ചെമ്മീൻ ലഭിക്കുന്നുണ്ട്. ഏറെക്കാലത്തിന് ശേഷമാണ് കിലോയ്ക്ക് 150 എന്ന വിലയിൽ ചെമ്മീൻ വിൽപന നടന്നത്.
സാധാരണ നിലയിൽ 300 രൂപയ്ക്ക് വിൽപന നടത്തിയിരുന്ന ചെമ്മീനാണ് ഇന്നലെ 150 രൂപയ്ക്ക് വിറ്റത്. വിലക്കുറവറിഞ്ഞ് ഒട്ടേറെപ്പേർ ആയിക്കര ഹാർബറിൽ മീൻ വാങ്ങാനെത്തി. അയല, മത്തി, അയക്കൂറ, ആവോലി എന്നിവയുടെ വില ഉയർന്നുതന്നെയാണ്. മത്തിക്ക് 280-300, അയല 300-340, അയക്കൂറ-ആവോലി 650-750 എന്നിങ്ങനെയാണ് കിലോയ്ക്ക് വില.
