കെട്ടിട നിർമാണ പെർമിറ്റ് ഫീസ് ഇളവ് ; ഈടാക്കിയ അധിക തുക തിരികെ ലഭിക്കും

തിരുവനന്തപുരം :- കഴിഞ്ഞ വർഷം ഏപ്രിൽ 10ന് വർധിപ്പിച്ച കെട്ടിട നിർമാണ പെർമിറ്റ് ഫീസിൽ 60% വരെ ഇളവ് വരുത്തി സർക്കാർ ഉത്തരവിറക്കി. ഇളവിന് 2023 ഏപ്രിൽ 10 മുതൽ പ്രാബല്യമുണ്ട്. ഈടാക്കിയ അധിക തുക ബാങ്ക് മുഖേന തിരിച്ച് കൊടുക്കാൻ തദ്ദേശ സ്ഥാപനങ്ങൾക്ക് അനുമതി നൽകി. 2025 മാർച്ച് 31നകം പണം തിരികെ കൊടുത്താൽ മതി.

അധിക തുക തിരിച്ച് കിട്ടാൻ പഞ്ചായത്തുകളിൽ ഐ എൽ ജി എം എസ്, നഗരസഭകളിൽ കെ സ്മാർട്ട് എന്നീ സോഫ്‌റ്റ്‌വെയർ വഴി ഓൺലൈൻ അപേക്ഷ നൽകണം. പെർമിറ്റ് രസീത് നഷ്ടപ്പെട്ടവർ, സത്യപ്രസ്താവന, അക്കൗണ്ട് വിവരങ്ങൾ, പാസ് ബുക്ക് പകർപ്പ് എന്നിവ നൽകി അപേക്ഷിക്കണം. പെർമിറ്റ്, അപേക്ഷ, ക്രമവൽകരണ ഫീസുകളിലെ അധിക തുക തിരികെ ലഭിക്കും. അപേക്ഷകർ ആവശ്യപ്പെട്ടാൽ അധിക തുക കെട്ടിടങ്ങളുടെ വസ്തു നികുതി ഇനത്തിൽ വരവുവച്ച് ക്രമീകരിക്കാം.