ന്യൂഡൽഹി :- 70 വയസ്സ് കഴിഞ്ഞവർക്ക് ആയുഷ്‌മാൻ ഭാരത് ആരോഗ്യ പരിരക്ഷ ഉറപ്പാക്കുന്നതിനുള്ള രെജിസ്ട്രേഷൻ നടപടികൾ ആരംഭിച്ചു. രെജിസ്ട്രേഷനായി മൊബൈൽ ഫോൺ ആപ്ലിക്കേഷനിലും (ആയുഷ്‌മാൻ ആപ്പ്) വെബ് പോർട്ടലിലും (beneficiary.nha.gov.in) പ്രത്യേക മൊഡ്യൂൾ തയാറാക്കിയിട്ടുണ്ടെന്നു സംസ്‌ഥാനങ്ങൾക്കയച്ച കത്തിൽ കേന്ദ്ര ആരോഗ്യ മന്ത്രാലയം അഡീഷനൽ സെക്രട്ടറി എൽ.എസ് ചാങ് സാൻ വ്യക്ത‌മാക്കി. വർഷം മുഴുവൻ റജിസ്ട്രേഷനു സൗകര്യമുണ്ട്. അടുത്തമാസം പദ്ധതി പ്രാബല്യത്തിലാകും. ആധാറാണ് റജിസ്ട്രേഷനു വേണ്ട ഏകരേഖ. ഇതിൽ രേഖപ്പെടുത്തിയിരിക്കുന്ന പ്രായത്തിന്റെ അടിസ്ഥാനത്തിലായിരിക്കും വയസ്സു നിശ്ചയിക്കുക.
ഒരു കുടുംബത്തിലെ മുതിർന്ന ആളുകൾക്ക് 5 ലക്ഷം രൂപ വരെയാണു സൗജന്യ ചികിത്സയ്ക്ക് അർഹത. കേന്ദ്ര-സംസ്ഥാന സർക്കാരുകളുടെ മറ്റ് ആരോഗ്യ ഇൻഷുറൻസ് പദ്ധതികളിലുള്ള ഗുണഭോക്താക്കൾക്ക് ഇരട്ടിപ്പു ഒഴിവാക്കാൻ അവരുടെ നിലവിലെ പദ്ധതിയോ ആയുഷ്‌മാൻ പരിരക്ഷയോ തിരഞ്ഞെടുക്കാൻ ഒറ്റത്തവണ ഓപ്ഷൻ നൽകും. സ്വകാര്യ ആരോഗ്യ പരിരക്ഷ, എംപ്ലോയീസ് സ്റ്റേറ്റ് ഇൻഷുറൻ സ് പദ്ധതി എന്നിവയുടെ ഭാഗമായവർക്ക് ആയുഷ്‌മാൻ ഭാരത് ആരോഗ്യപദ്ധതിയുടെ ആനുകൂല്യങ്ങൾ ലഭിക്കും.
