കണ്ണൂർ :- ഇന്ത്യയിലെ ആദ്യത്തെ സൂപ്പർ കപ്പാസിറ്റർ ഉൽപ്പാദനകേന്ദ്രം ചൊവ്വാഴ്ച കണ്ണൂരിൽ പ്രവർത്തനമാരംഭിക്കും. സംസ്ഥാന വ്യവസായ വകുപ്പിലുള്ള കെൽട്രോൺ കോംപണന്റ് കോംപ്ലക്സാണ് പുതിയ പ്ലാന്റ് ആരംഭിക്കുന്നത്. ചൊവ്വ രാവിലെ 9.30 ന് കണ്ണൂർ കെൽട്രോൺ കോംപണന്റ് കോംപ്ലക്‌സിൽ നടക്കുന്ന ചടങ്ങിൽ മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. വ്യവസായ മന്ത്രി പി.രാജീവ് അധ്യക്ഷനാകും.
ഇവിടെ നിന്ന് ലോകനിലവാരത്തിലുള്ള സൂപ്പർ കപ്പാസിറ്ററുകൾ തദ്ദേശീയമായി നിർമിച്ച് ഇന്ത്യൻ പ്രതിരോധമേഖലയ്ക്കും ഇലക്ട്രിക് വാഹനങ്ങൾക്കും ബഹിരാകാശ ദൗത്യങ്ങൾക്കും ഉൾപ്പെടെ വിതരണം ചെയ്യും. ഇറക്കുമതിചെയ്ത യന്ത്രങ്ങൾ ഘടിപ്പിക്കുന്നതുൾപ്പെടെയുള്ള നിർമാണം പൂർത്തിയായി. പ്ലാൻ്റിൽ ദിവസം 2000 സൂപ്പർ കപ്പാസിറ്റർ നിർമിക്കാനാകും. ബൈക്ക് മുതൽ ബഹിരാകാശവാഹനങ്ങളിലടക്കം ഉപയോഗിക്കുന്ന ഘടകമാണ് ഉയർന്ന ശേഷിയുള്ള കപ്പാസിറ്ററുകളായ സൂപ്പർ കപ്പാസിറ്റർ. ബാറ്ററികളേക്കാൾ പെട്ടെന്ന് ചാർജ് സ്വീകരിക്കാനും വിതരണം ചെയ്യാനും സാധിക്കും.
ദീർഘകാലത്തേക്ക് തകരാറില്ലാതെ പ്രവർത്തിക്കുന്ന സൂപ്പർ കപ്പാസിറ്ററുകൾ ഇലക്ട്രിക് വാഹനങ്ങൾ, ഓട്ടോമോട്ടീവ് യന്ത്രങ്ങൾ, ഇൻവർട്ടറുകൾ, എനർജി മീറ്റർ തുടങ്ങി ഒട്ടേറെ ഉപകരണങ്ങളിൽ ഉപയോഗിക്കുന്നുണ്ട്. ഐഎസ്ആർഒയുടെ സാങ്കേതിക സഹകരണത്തോടെയാണ് പദ്ധതി നടപ്പാക്കുന്നത്. 42 കോടി മുതൽമുടക്കുള്ള പദ്ധതിയുടെ ആദ്യഘട്ടം 18 കോടി ചെലവഴിച്ചാണ് പൂർത്തിയാക്കിയത്. നാലു കോടി ചെലവിൽ നിർമിച്ചഡ്രൈറൂമുകളും വിദേശത്തുനിന്ന് ഇറക്കുമതി ചെയ്തവ ഉൾപ്പെടെ പതിനൊന്ന് മെഷിനറികളും ഒന്നാംഘട്ടത്തിൽ ഉൾപ്പെടുന്നു. നാലാം വർഷത്തോടെ 22 കോടിയുടെ വാർഷിക വിറ്റുവരവും മൂന്നു കോടിയുടെ വാർഷിക ലാഭവും പ്രതീക്ഷിക്കുന്നു.
