ലോകം ഇന്ന് ദീപാവലി ആഘോഷത്തിന്‍റെ നിറവിൽ. ദീപാലങ്കാരങ്ങൾ കൊണ്ടാഘോഷിക്കുന്ന ഒരുത്സവമാണ്‌ ദീപാവലി അഥവാ ദിവാലി. തുലാമാസത്തിലെ അമാവാസി ദിവസമാണ് ദീപാവലി ആഘോഷിച്ചുവരുന്നത്. അഞ്ച് ദിവസം നീണ്ടു നിൽക്കുന്ന ഈ ഉത്സവത്തിന്‍റെ അവസാന ദിവസമാണ് ദീപാവലി ദിവസമായി ആഘോഷിക്കുന്നത്. പല നാട്ടിലും പല വിധത്തിലാണ് ദീപാവലി ആഘോഷിക്കുന്നത്.തിന്മയുടെ മേൽ നന്മയുടെ വിജയത്തെ ആഘോഷിക്കുന്ന ഉത്സവമാണ് ദീപാവലി. അന്ന് വിശ്വാസികള്‍ ലക്ഷ്‌മി ദേവിയെയും ഗണപതിയെയും ആരാധിക്കുന്നു. ദീപാവലിയുമായി ബന്ധപ്പെട്ട് നിരവധി ഐതിഹ്യങ്ങളാണ് ഉള്ളത്.ശ്രീകൃഷ്ണനുമായി ബന്ധപ്പെട്ടതാണ് ഏറെ പ്രചാരത്തിലുള്ള ഐതിഹ്യം. നരകാസുര വധിച്ചതിന്റെ ആഘോഷമായാണ് ദീപാവലിയെന്നതാണ് ഒന്ന്. എന്നാല്‍ രാമനുമായി ബന്ധപ്പെട്ടും ദീപാവലിക്ക് ഐതിഹ്യമുണ്ട്.രാവണനിഗ്രഹം നടത്തി സീതാദേവിയെ വീണ്ടെടുത്തതിന്റെ സ്മരണയ്ക്കാണ് ദീപാവലിയെന്നതാണ് മറ്റൊരു ഐതിഹ്യം. നരകാസുരനെ ഭഗവാൻ മഹാവിഷ്‌ണു വധിച്ചതുമായി ബന്ധപ്പെട്ടതാണെന്നും വിശ്വാസികള്‍ പറയുന്നു. പതിനാല് വര്‍ഷത്തെ വനവാസം കഴിഞ്ഞ് അയോധ്യയില്‍ തിരിച്ചെത്തിയ ശ്രീരാമനെ ജനങ്ങള്‍ ദീപങ്ങള്‍ തെളിയിച്ച് വരവേറ്റു എന്ന മറ്റൊരു ഐതിഹ്യവും നിലവിലുണ്ട്.
കൂരിരുട്ടിനെ വെളിച്ചത്താല്‍ ഇല്ലാതാക്കുന്ന ആഘോഷരാത്രി. മിഠായി മധുരമാണ് ദീപാവലി വെളിച്ചത്തിനൊപ്പം ആദ്യം തെളിയുക. വിരുന്നെത്തുന്ന മിഠായി മധുരങ്ങള്‍ക്കൊപ്പം കണ്ണഞ്ചിപ്പിക്കുന്ന ദീപപ്രഭയും.ഒരാണ്ടിന്റെ കാത്തിരിപ്പില്‍ തെരുവുകള്‍ കയ്യടക്കുന്ന വെളിച്ചവും മധുരപ്പെട്ടികളും നിര്‍ത്താതെയുള്ള പടക്കങ്ങളും. ആഘോഷമാണ് ദീപാവലിയെന്ന ദീപോത്സവത്തെ പകിട്ടാക്കുന്നത്.
ഉത്തരേന്ത്യയില്‍ തെരുവുകള്‍ കയ്യടക്കുന്ന ഈ ആഘോഷം കേരളത്തിലെത്തുമ്പോള്‍ അത്ര പകിട്ടില്‍ തെളിയാറില്ലെങ്കിലും മറ്റ് പല ആഘോഷങ്ങളെയും പോലെ അതിര്‍ത്തികളില്ലാതെ ദീപാവലിയും മലയാളി ആഘോഷിച്ചു തുടങ്ങി.
തിന്മയുടെ മേല്‍ നന്മ നേടിയ വിജയത്തിന്‍റെ ഒര്‍മ പുതുക്കലാണ് മലയാളികൾക്ക് ദീപാവലി. ദീപം തെളിയിച്ചും പടക്കം പൊട്ടിച്ചും മധുരം പങ്കുവച്ചും മലയാളികൾ ദീപാവലിയെ ആഘോഷമാക്കാറുണ്ട്. രാജ്യത്തിന്‍റെ ഇതര സംസ്ഥാനങ്ങളില്‍ നിന്ന് കുടിയേറിയിവരും ദീപാവലി ആഘോഷങ്ങളില്‍ മലയാളികൾക്കൊപ്പം ചേരുന്നു.
എല്ലാ വായനക്കാർക്കും കൊളച്ചേരി വാർത്തകൾ Online News ൻ്റെ ദീപാവലി ആശംസകൾ...
