നാറാത്ത് :- പാമ്പുരുത്തി ശ്രീ കൂറുമ്പ പുതിയ ഭഗവതി ക്ഷേത്രത്തിൽ അമ്മയ്ക്കൊരു പൊങ്കാല സമർപ്പണവും ക്ഷേത്ര ഊരാള കുടുംബാംഗമായ കെ.പുഷ്പജനെ ക്ഷേത്രത്തിലെ തന്ത്രിയായി ആചാരപ്പെടുത്തലും മണ്ഡലകാല നടയരി പൂജയുടെ സമാപന ദിവസമായ ഡിസംബർ 25ന് നടക്കും. രാവിലെ 9.18 നും 10 മണിക്കും ഇടയിലുള്ള ശുഭമുഹൂർത്തത്തിൽ കൊട്ടുംപുറത്ത് വച്ച് പഴയ ആചാര രീതിയിലുള്ള വെള്ളയും കരിമ്പടവും വിരിച്ച് മേലായിമാരും ഊരാള സ്ഥാനികന്മാരും കാരണവന്മാരും ചേർന്ന് നാമകരണം ചെയ്യും.
10 മണിക്ക് പൊങ്കാല അടുപ്പിൽ അഗ്നിപകരൽ, 11.30 ന് പൂജാദി കർമ്മങ്ങളും നിവേദ്യാദി പൂജകളും നടക്കും തുടർന്ന് ഉപദേവിമാർക്ക് (വിഷ്ണുമൂർത്തി, ദണ്ഡൻ, കണ൦കർണൻ, വീരൻ) പൂജകൾ നടക്കും. ശേഷം ശ്രീ കൂറുമ്പ പുതിയ ഭഗവതി, വിഷ്ണുമൂർത്തി എന്നീ ദേവന്മാരുടെ നർത്തനവും, കൂടിയാട്ടവും ഉണ്ടാവും.
1.30 ന് പ്രസാദ സദ്യ, 2 മണിക്ക് ഭക്തജനങ്ങളെ അനുഗ്രഹിക്കൽ, തുടർന്ന് മൂവരും ചേർന്ന് കരം പിടിച്ച് എമ്പ്രോനെ ശ്രീകോവിലിൽ പ്രവേശിപ്പിക്കും. 3.30 ന് പണ്ടാരപ്പുരയിലേക്ക് വാദ്യത്തോടുകൂടി തിരിച്ചു എഴുന്നള്ളിപ്പ്. തുടർന്ന് ഊരാള സ്ഥാനികരും മറ്റ് ക്ഷേത്രസ്ഥാനികളും ഭക്തജനങ്ങളും ഊരാള കുടുംബാംഗങ്ങളും ചേർന്ന് എമ്പ്രോനെ വീട്ടിൽ വച്ച് പേർ വിളിക്കൽ ചടങ്ങും നടക്കും.
