തിരുവനന്തപുരം :- ഇ മെയിലിൽ സ്റ്റോറേജ് സ്പേസ് തീർന്നതിനാൽ അക്കൗണ്ട് റദ്ദാക്കുമെന്നു മുന്നറിയിപ്പു നൽകി സമൂഹ മാധ്യമങ്ങളിൽ പുതിയതരം തട്ടിപ്പ് ആരംഭിച്ചിട്ടുണ്ടെന്നും ജനങ്ങൾ ജാഗ്രത പാലിക്കണമെന്നും പോലീസിൻ്റെ മുന്നറിയിപ്പ്. ജി : മെയിൽ അക്കൗണ്ട് ഉപയോക്ത‌ാക്കളെ കേന്ദ്രീകരിച്ചാണു തട്ടിപ്പ്. അക്കൗണ്ട് പുനഃസ്‌ഥാപിക്കാനായി ഇ മെയിലിനോടൊപ്പം ലഭിക്കുന്ന ലിങ്കിൽ ക്ലിക്ക് ചെയ്യണമെന്നാണു സന്ദേശത്തിൻ്റെ ഉള്ളടക്കം. ലിങ്കിൽ ക്ലിക്ക് ചെയ്യുന്നതോടെ തട്ടിപ്പുകാരുടെ വെബ്സൈറ്റിലേക്ക് എത്തുകയും അതുവഴി കംപ്യൂട്ടറിലേക്ക് വൈറസുകളും മാൽ വെയറുകളും കയറാനോ ബാങ്ക് അക്കൗണ്ടുമായി ബന്ധപ്പെട്ട വിവരങ്ങൾ നൽകു ന്നതോടെ പണം നഷ്‌ടപ്പെടാനോ സാധ്യതയുണ്ട്.
ഗൂഗിളിന്റേതെന്ന മട്ടിൽ വരുന്ന സന്ദേശമായതിനാൽ പലരും വിശ്വസിക്കാനും ലിങ്കിൽ ക്ലിക്ക് ചെയ്യാനും സാധ്യതയുണ്ട്. ഇത്തരത്തിലുള്ള ഇ മെയിൽ ലഭിച്ചാലുടൻ ഗൂഗിൾ അക്കൗണ്ട് സെറ്റിങ്സിൽ സ്റ്റോറേജ് വിവരങ്ങൾ പരിശോധിക്കണം. ഇമെയിൽ വഴി ലഭിക്കുന്ന ലിങ്കുകളിൽ ക്ലിക്ക് ചെയ്യരുത്. സാമ്പത്തിക തട്ടിപ്പിനിരയായാൽ ഉടൻതന്നെ 1930 എന്ന നമ്പറിൽ വിവരം അറിയിക്കണമെന്നും പൊലീസ് മുന്നറിയിപ്പു നൽകുന്നു.
