കൊച്ചി :- സർക്കാർ സ്കൂളുകളിൽ പി.ടി.എ നടത്തുന്ന പ്രീപ്രൈമറി സ്കൂളുകളിലെ അധ്യാപകരുടെ ഓണറേറിയം 27,500 രൂപയും ആയമാരുടേത് 22,500 രൂപയുമാക്കി വർധിപ്പിക്കാൻ ഹൈക്കോടതി ഉത്തരവിട്ടു. ഓൾ കേരള പ്രീ പ്രൈമറി സ്റ്റാഫ് അസോസിയേഷനും അധ്യാപകരും ഫയൽ ചെയ്ത ഒരുകൂട്ടം ഹർജികളിൽ ജസ്റ്റിസ് ഹരിശങ്കർ വി.മേനോന്റെതാണ് ഉത്തരവ്.
മാർച്ചിൽത്തന്നെ നടപ്പാക്കി ഏപ്രിൽ മുതൽ വിതരണം ചെയ്യണമെന്നും നിർദേശിച്ചിട്ടുണ്ട്. നിലവിൽ 12,500, 7500 എന്നിങ്ങനെയാണ് ഓണറേറിയം. മുൻ ഉത്തരവുണ്ടായ 2012 ഓഗസ്റ്റ് ഒന്നുമുതൽ പുതിയ നിരക്കിൽ കുടിശ്ശിക കണക്കാക്കി ആറുമാസത്തിനുള്ളിൽ നൽകണമെന്നും നിർദേശിച്ചു. ഹർജിക്കാർക്കുവേണ്ടി സീനിയർ അഭിഭാഷകരായ എബ്രഹാം വാക്കനാൽ, ജോർജ് പൂന്തോട്ടം തുടങ്ങിയവർ ഹാജരായി.
