ചേലേരി :- ചേലേരിയിൽ സ്കൂട്ടറിലെത്തി കത്തികാണിച്ച് ഭീഷണിപ്പെടുത്തി യുവതിയുടെ നാല് പവന്റെ മാല കവർന്നയാൾ മണിക്കൂറുകൾക്കകം മയ്യിൽ പോലീസിന്റെ പിടിയിലായി. ചേലേരിയിലെ കെ.സനീഷിനെ (35) യാണ് മയ്യിൽ സ്റ്റേഷൻ ഇൻസ്പെക്ടർ പി.സി സഞ്ജയ് കുമാറും സംഘവും പിടികൂടിയത്.
ഇന്നലെ വൈകുന്നേരം 6.10 ഓടെയാണ് സംഭവം നടന്നത്. ചേലേരിയിൽ ബേക്കറി ഷോപ്പ് നടത്തുന്ന പ്രകാശന്റെ ഭാര്യ തേത്തോത്ത് വീട്ടിൽ ദീപ്‌തി പ്രകാശന്റെ (42) നാല് പവന്റെ മാലയാണ് മോഷ്ടാവ് കവർന്നത്. ബേക്കറിയിൽ നിന്നും ജോലി കഴിഞ്ഞ് വീട്ടിലേക്കു നടന്നു പോകവെ ചേലേരി കനാൽ റോഡിന് സമീപം വെച്ച് സ്കൂട്ടറിൽ ഹെൽമെറ്റും മഴക്കോട്ടും ധരിച്ചെത്തിയ പ്രതി യുവതിയെ ആക്രമിച്ച് കഴുത്തിൽ ധരിച്ചിരുന്ന നാല് പവന്റെ മാല പൊട്ടിക്കുകയായിരുന്നു.
പിടിവലിയിൽ മലയുടെ അരപ്പവൻ തൂക്കം വരുന്ന ഭാഗമാണ് മോഷ്ടാവിന്റെ കയ്യിൽ കിട്ടിയത്. ഉടൻ അതുമായി സ്കൂട്ടറിൽ കടന്നു കളയുകയായിരുന്നു. തുടർന്ന് യുവതിമ യ്യിൽ പോലീസിൽ പരാതി നൽകി. കേസെടുത്ത പോലീസ്‌ചുകന്ന സ്കൂട്ടറിലെത്തിയ മോഷ്‌ടാവിനെ കുറിച്ച് യുവതി നൽകിയ സൂചനകൾ വെച്ച് മോഷ്‌ടാവിനെ മണിക്കൂറുകൾക്കുള്ളിൽ മയ്യിൽ പോലീസ് പിടികൂടുകയായിരുന്നു.
