മയ്യഴി :- മാഹി സെയ്ന്റ് തെരേസ ബസിലിക്ക തിരുനാൾ ഉത്സവത്തിന്റെ ഭാഗമായി മാഹി പോലീസ് ക്രമസമാധാനപാലനത്തിനും ഗതാഗതനിയന്ത്രണത്തിനും വിപുലമായ ക്രമീകരണങ്ങൾ ഏർപ്പെടുത്തി. തിരുനാളിന്റെ പ്രധാനദിനങ്ങളായ 14, 15 തീയതികളിൽ തലശ്ശേരി ഭാഗത്തുനിന്ന് വരുന്ന ബസ്, ലോറി മുതലായ വാഹനങ്ങൾ മുണ്ടോ ക്ക് റോഡ് വഴി മാഹി റെയിൽവേ സ്റ്റേഷൻ്റെ മുൻവശത്ത് കൂടി അഴിയൂർ ചുങ്കം ഭാഗത്തേക്ക് കടന്നുപോകണം. വടകര ഭാഗത്തുനിന്ന് വരുന്ന ലോറി ഉൾപ്പെടെയുള്ള വലിയ വാഹനങ്ങൾ കുഞ്ഞിപ്പള്ളി ഭാഗത്തു നിന്ന് ബൈപ്പാസ് റോഡ് വഴി തിരിച്ചുവിടും.
ചെറിയ വാഹനങ്ങൾ മാഹി ഗവ.ഹോസ്പിറ്റൽ ജങ്ഷനിൽ നിന്ന് ഇടത് ഭാഗത്തേക്ക് തിരിഞ്ഞ് താഴങ്ങാടി റോഡ്, ടാഗോർ പാർക്ക് റോഡ് വഴി പോലീസ് സ്റ്റേഷൻ്റെ മുൻവശത്ത് കൂടി കടന്ന് മാഹിപ്പാലം ഭാഗത്തേക്ക് പോകണം. മെയിൻ റോഡിൽ സെമിത്തേരി റോഡ് ജങ്ഷൻ മുതൽ ഗവ.ആസ്പത്രി ജങ്ഷൻ വരെയും വാഹനങ്ങൾക്ക് പാർക്കിങ് അനുവദിക്കില്ല. വാഹന ങ്ങൾ പാർക്ക് ചെയ്യാൻ മാഹി കോളേജ് ഗ്രൗണ്ട്, മഞ്ചക്കൽ ഇൻഡോർ സ്റ്റേഡിയം, ടാഗോർ പാർക്കിൻ്റെ തെക്കുവശം, ഗവ. ഗസ്റ്റ് ഹൗസിനുവേണ്ടി നീക്കിവെച്ച സ്ഥലം. സെമിത്തേരി റോഡ് എന്നിവ പാർക്കിങ്ങിനായി ഉപയോഗിക്കാം. സുരക്ഷാക്രമീകരണങ്ങളുടെ ഭാഗമായി ദേവാലയത്തിനകത്ത് മൊബൈൽ ഫോൺ, കടലാസുപൊതികൾ, ബാഗ്, മറ്റ് സാമഗ്രികൾ ഒന്നും തന്നെ അനുവദിക്കില്ല. 14-ന് മാഹി ടൗണിൽ മദ്യശാലകൾ പ്രവർത്തിക്കില്ല.
