കോട്ടയം :- ഗതാഗത വകുപ്പിന്റെ ശബരിമല 'സേഫ് സോൺ' പദ്ധതിക്കു റോഡ് സുരക്ഷാ അതോറിറ്റി ഇത്തവണ റെക്കോർഡ് തുക അനുവദിച്ചു. 1.40 കോടി രൂപയിലധികമാണ് അനുവദിച്ചത്. മുൻവർഷത്തെക്കാൾ മൂന്നിരട്ടിയാണിത്. മുൻകൂറായി 50 ലക്ഷം രൂപ അനുവദിക്കാനും തീരുമാനിച്ചു. തിരഞ്ഞെടുപ്പ് കമ്മിഷൻ്റെ അനുമതിയും ലഭിച്ചു. തുക ഇന്നു തന്നെ ട്രാൻസ്പോർട് കമ്മിഷണർക്ക് ലഭിച്ചേക്കും. കോട്ടയം, പത്തനംതിട്ട, ഇടുക്കി ജില്ലകളിൽ അപകടങ്ങളും ഗതാഗതക്കുരുക്കും ഒഴിവാക്കി ശബരിമല മണ്ഡലകാല തീർഥാടനം സുഗമവും സുരക്ഷിതവുമാക്കാൻ 2010 മുതൽ ഗതാഗത വകുപ്പും റോഡ് സുരക്ഷാ അതോറിറ്റിയും ചേർന്നു നടപ്പാക്കുന്ന പദ്ധതിയാണിത്.
24 മണിക്കൂറും വാഹനപരിശോധന, ദിശാ ബോർഡ് സ്ഥാപിക്കൽ, ഡ്രൈവർമാർക്കു ചുക്കുകാപ്പി വിതരണം, വാഹന സർവീസ് സെൻ്ററുകൾ സ്ഥാപിക്കൽ, വഴിയിൽ കേടാകുന്ന വാഹനങ്ങൾ മാറ്റാൻ ക്രെയിൻ സേവനം, ആംബുലൻസ് സേവനം, തീർഥാടകർക്കു ബിസ്‌കറ്റും കുടിവെള്ളവും നൽകൽ തുടങ്ങിയവയാണു പദ്ധതിയുടെ ഭാഗമായി നടത്തുന്നത്. റിഫ്ലക്‌ടിങ് ജാക്കറ്റ്, ബാറ്റൺ ലൈറ്റ്, ടോർച്ച്, കുട, മഴ ക്കോട്ട് എന്നിവയെല്ലാം തീർഥാടനപാതയിൽ ജോലി ചെയ്യുന്ന ഉദ്യോഗസ്ഥർക്കു നൽകും. അപകടസാധ്യത കൂടിയ ബ്ലാക്ക് സ്പോട് മേഖലകൾ വ്യക്തമാക്കുന്ന രീതിയിൽ അയൽസംസ്ഥാനങ്ങളിൽ ഉൾപ്പെടെ വിഡിയോ പ്രദർശനവും നടത്തും.
മലയാളം, ഇംഗ്ലിഷ്, ഹിന്ദി, തമിഴ്, തെലുങ്ക്, കന്നഡ എന്നിങ്ങനെ ആറു ഭാഷകളിലാണു വിഡിയോ. കഴിഞ്ഞ തവണ വിഡിയോ നിർമിച്ചവർക്കു നൽകാനുള്ള തുകയും അനുവദിച്ചിട്ടുണ്ട്. പുതിയ ബ്ലാക്ക് സ്പോട്ടുകൾ ഉണ്ടെങ്കിൽ മാത്രം പുതിയ വിഡിയോ നിർമിക്കാമെന്നും അല്ലാത്തപക്ഷം കഴിഞ്ഞ വർഷത്തെ വിഡിയോ തന്നെ ഉപയോഗിച്ചാൽ മതിയെ ന്നും നിർദേശമുണ്ട്. അവധിദിനത്തിന്റെ നിലയിലായിരുന്നു ഇന്നലെ സന്നിധാനം. ഉച്ചവരെ കാര്യമായ തിരക്ക് അനുഭവപ്പെട്ടില്ല. നടപ്പന്തലിൽ ക്യൂ നിൽക്കാതെ തന്നെ വന്നവർക്കെല്ലാം പതിനെട്ടാംപടി ചവിട്ടാൻ കഴിഞ്ഞു. എന്നാൽ വൈകിട്ടോടെ നടപ്പന്തൽ നിറഞ്ഞ് തീർഥാടകരെത്തി. ഇട യ്ക്കൊക്കെ മഴചാറി മുടികെട്ടി നിന്ന അന്തരീക്ഷമായിരുന്നു ഇന്നലെ.
