ശബരിമല :- മണ്ഡലകാല തീർഥാടനം പൂർത്തിയാക്കി അയ്യപ്പ ക്ഷേത്രനട 27ന് അടയ്ക്കും. ഉച്ചയ്ക്കാണ് മണ്ഡലപൂജയെങ്കിലും അത്താഴപ്പൂജ കഴിഞ്ഞ് രാത്രി പത്തിനാകും നട അടയ്ക്കുക. 35,000 പേർക്കാണ് ഡിസംബർ 27നു വെർച്വൽ ക്യൂ വഴി ദർശനം അനുവദിച്ചിട്ടുള്ളത്. മകരവിളക്ക് തീർഥാടനത്തിനായി 30നു വൈകുന്നേരം 5 മണിക്ക് നട തുറക്കും. അന്നു പ്രത്യേക പൂജകളില്ലെങ്കിലും ദർശനം നടത്താം. മകരവിളക്കു കാലത്തെ പൂജകളും അഭിഷേകവും 31നു പുലർച്ചെ മൂന്നിന് ആരംഭിക്കും.
ജനുവരി 14ന് ആണ് മകരവിളക്ക്. എരുമേലി പേട്ടതുള്ളൽ ജനുവരി 11 നും. മകരസംക്രമ സന്ധ്യയിൽ അയ്യപ്പ സ്വാമിക്ക് ചാർത്താനുള്ള തിരുവാഭരണവുമായുള്ള ഘോഷയാത്ര ജനുവരി 12 നു പന്തളം കൊട്ടാരത്തിൽ നിന്നു പുറപ്പെട്ട് 14 ന് വൈകുന്നേരം സന്നിധാനത്തെത്തും. ശരംകുത്തിയിൽ നിന്നു സ്വീകരിച്ച് ആഘോഷമായി സന്നിധാനത്ത് എത്തിച്ച് അയ്യപ്പ വിഗ്രഹത്തിൽ ചാർത്തി ദീപാരാധന നടക്കും. ഈ സമയം പൊന്നമ്പലമേട്ടിൽ മകരജ്യോതി തെളിയും.
