കാലിഫോർണിയ :- അടിമുടി അപ്ഡേറ്റായിക്കൊണ്ടിരിക്കുന്ന വാട്സ്ആപ്പിൽ മറ്റൊരു ഫീച്ചർ കൂടി ഉടനെത്തും. ഫേസ്ബുക്കിന് സമാനമായി കവർ ചിത്രം ചേർക്കാനുള്ള സൗകര്യം വാട്സ്ആപ്പിൻ്റെ ഐഒഎസ് വേർഷനിലേക്ക് വരുന്നതായാണ് റിപ്പോർട്ട്. അതായത്, ഐഫോൺ ഉപയോക്താക്കളുടെ വാട്സ്ആപ്പിലാണ് കവർ ഫോട്ടോ ഫീച്ചർ ആദ്യം പ്രത്യക്ഷപ്പെടുക. ആൻഡ്രോയ്ഡ് പതിപ്പുകളിൽ ഇതിന് ശേഷമായിരിക്കും ഫീച്ചർ വരിക. വാട്സ്ആപ്പിന്റെ പുത്തൻ ഐഒഎസ് 26.1.10.71 ബീറ്റ വേർഷനിലാണ് കവർ ഫോട്ടോ സവിശേഷത കണ്ടെത്തിയതെന്ന് വാബീറ്റ ഇൻഫോ റിപ്പോർട്ട് ചെയ്തു. വാട്സ്ആപ്പ് അപ്ഡേറ്റുകൾ കൃത്യമായി അറിയിക്കുന്ന പ്ലാറ്റ്ഫോമാണ് വാബീറ്റ ഇൻഫോ.
പുത്തൻ വാട്സ്ആപ്പ് ഫീച്ചർ
വാട്സ്ആപ്പ് അക്കൗണ്ടുകളിൽ പ്രൊഫൈൽ കസ്റ്റമൈസേഷൻ വിശാലമാക്കുകയാണ് മെറ്റ. ഡിപിക്ക് പുറമെ കവർ ഫോട്ടോ കൂടി വരുന്നതോടെ വാട്സ്ആപ്പ് അക്കൗണ്ടുകളുടെ പ്രൊഫൈൽ മനോഹരമാകും. നിലവിൽ ഫേസ്ബുക്കിലും എക്സിലുമെല്ലാം ഇത്തരം കവർ ചിത്ര ഓപ്ഷനുകളുണ്ട്. ഇപ്പോൾ വാട്സ്ആപ്പ് അക്കൗണ്ടുകളിൽ പ്രൊഫൈൽ ഫോട്ടോകൾക്ക് മാത്രമാണ് മുൻഗണനയുള്ളത്. കവർ ചിത്രങ്ങൾ കൂടി വരുന്നതോടെ പ്രൊഫൈലുകൾ കൂടുതൽ ആകർഷകമാകും.
പ്രൊഫൈൽ ഇൻ്റർഫേസിൽ കവർ ചിത്രത്തിനായി പ്രത്യേക സെക്ഷൻ വാട്സ്ആപ്പ് സൃഷ്ടിക്കും. പ്രൊഫൈലിന്റെ ഏറ്റവും മുകളിൽ, അതായത് ഡിപി, പേര്, ബയോ എന്നിവയ്ക്ക് മുകളിലായാണ് ഈ കവർ ചിത്രം പ്രത്യക്ഷപ്പെടുക എന്നാണ് സൂചന. ഇത്രയും വിവരങ്ങൾ ചേരുന്ന പ്രൊഫൈൽ ഇൻ്റർഫേസിന്റെ ഡിസൈൻ വാട്സ്ആപ്പ് ലളിതമായാണ് അവതരിപ്പിക്കുക എന്ന് ബീറ്റ പതിപ്പ് സൂചിപ്പിക്കുന്നു. പ്രൊഫൈൽ സ്ക്രീനിനെ ബാധിക്കാത്ത തരത്തിലായിരിക്കും ഇത്. നിലവിൽ പ്രൊഫൈൽ ചിത്രങ്ങൾ എഡിറ്റ് ചെയ്യുകയോ മാറ്റുകയോ ചെയ്യുന്നതുപോലെ തന്നെ, വാട്സ്ആപ്പിലെ സെറ്റിംഗ്സിൽ പ്രവേശിച്ച് തന്നെയാവും പ്രൊഫൈൽ ഇൻ്റർഫേസ് ആക്സ് ചെയ്യേണ്ടത്. ഇതിന് ശേഷം ക്യാമറയിൽ നിന്ന് നേരിട്ടോ ഫോട്ടോ ലൈബ്രറിയിൽ നിന്നോ ചിത്രം തെരഞ്ഞെടുക്കുക. ഈ ഫോട്ടോ പൊസിഷൻ ക്രമീകരിച്ച് സെറ്റ് ചെയ്യാനുമാകും.
മുമ്പ് ബിസിനസ് അക്കൗണ്ടുകളിൽ മാത്രം
വാട്സ്ആപ്പ് കവർ ഫോട്ടോ എന്നത് അത്ര പുതുമയൊന്നും അല്ല വാട്സ്ആപ്പിൽ. വാട്സ്ആപ്പ് ബിസിനസ് അക്കൗണ്ടുകളിൽ നിലവിലുള്ള ഫീച്ചർ ആണിത്. ബ്രാൻഡിംഗും ലോഗോയും മറ്റ് സുപ്രധാന വിവരങ്ങളും ഹൈലൈറ്റ് ചെയ്യാനാണ് വാട്സ്ആപ്പ് ബിസിനസിൽ കവർ ഇമേജ് ഫീച്ചർ ആളുകൾ ഉപയോഗിക്കുന്നത്. എന്നാൽ വ്യക്തിഗത വാട്സ്ആപ്പ് അക്കൗണ്ടുകളിൽ കവർ ചിത്രം ഉൾപ്പെടുത്തുന്ന ഫീച്ചർ പുതുമയാണ്. ഫേസ്ബുക്കിൽ പ്രൊഫൈലിന് ഏറ്റവും മുകളിലായി കവർ ഫോട്ടോ വരുന്ന അതേ മാതൃകയിൽ തന്നെയാണ് വാട്സ്ആപ്പിലെ കവർ ഫോട്ടോയും വരിക. വാട്സ്ആപ്പ് കവർ ഫോട്ടോ അക്കൗണ്ട് ഉടമകൾക്കും, അവരുടെ പ്രൊഫൈൽ സന്ദർശിക്കുന്ന മറ്റാളുകൾക്കും കാണാൻ കഴിയും.
