കമ്പിൽ :- കമ്പിൽ ടൗണിലെ ബസ് സ്റ്റോപ്പിൽ റോഡരികിൽ അനധികൃതമായി വാഹനങ്ങൾ പാർക്ക് ചെയ്യുന്നത് പതിവാകുന്നു. കമ്പിൽ KLIC ആശുപത്രി - മയ്യിലിലേക്കുള്ള ബസ് സ്റ്റോപ്പിലാണ് PWD നിർമ്മിച്ച ബസ് വേയ്ക്ക് അടുത്ത് വാഹനങ്ങൾ പാർക്ക് ചെയ്യുന്നത്. വാഹനങ്ങൾ കാരണം യാത്രക്കാർക്ക് ബസിൽ കയറാൻ ബുദ്ധിമുട്ടാകുകയാണ്. വാഹനങ്ങളുടെ അനധികൃത പാർക്കിങ് കാരണം ബസുകൾ റോഡിൽ നിർത്തി ആളുകളെ കയറ്റുകയാണ്. ഇത് റോഡിൽ ഗതാഗത തടസ്സം ഉണ്ടാക്കുകയും വാഹനങ്ങൾ യൂടേൺ എടുക്കുന്ന ഘട്ടത്തിൽ അപകടം പതിവാകുകയും ചെയ്യുന്ന അവസ്ഥയാണ്.
അധികൃതർ ഇടപെട്ട് പ്രശ്നത്തിന് പരിഹാരം കാണണമെന്ന് PWD അധികൃതരോടും മയ്യിൽ പോലീസ് അധികാരികളോടും കമ്പിൽ സംഘമിത്ര കലാ സാംസ്കാരിക കേന്ദ്രം ആവശ്യപ്പെട്ടു. കമ്പിൽ KLIC ആശുപത്രി ബസ് സ്റ്റോപ്പിൽ ബോർഡ് സ്ഥാപിച്ച് സ്വകാര്യ വാഹന പാർക്കിംഗ് ഒഴിവാക്കി യഥാസമയം ബസുകൾക്ക് നിർത്തിയിടാൻ സൗകര്യമൊരുക്കണമെന്ന് സംഘമിത്ര ആവശ്യപെട്ടു. അനധികൃത പാർക്കിംഗ് നടത്തുന്ന വാഹനങ്ങൾ പിടിച്ചെടുക്കുന്നതടക്കമുള്ള കർശന നിയമനടപടി സ്വീകരിക്കണമെന്നും അധികാരികളോട് ആവശ്യപ്പെട്ടു.
