മുണ്ടേരി :- മുണ്ടേരി പഞ്ചായത്തിലെ യുവതലമുറയുടെ ഏറെക്കാലത്തെ കായിക സ്വപ്നങ്ങൾക്ക് ജീവൻ വെയ്ക്കുന്നു. പുതുതായി നിർമ്മിക്കാൻ ഉദ്ദേശിക്കുന്ന ആധുനിക കായിക സ്റ്റേഡിയത്തിന്റെയും മുണ്ടേരി ഗവൺമെന്റ് ഹയർ സെക്കൻഡറി സ്കൂളിൽ സ്ഥാപിക്കുന്ന ഫെസിലിറ്റേഷൻ സെന്ററിന്റെയും നിർദ്ദിഷ്ട സ്ഥലം കണ്ണൂർ എം.എൽ.എ. അഡ്വ. ടി.ഒ. മോഹനന്റെയും പഞ്ചായത്ത് പ്രസിഡന്റ് സി.കെ. റസീനയുടെയും നേതൃത്വത്തിൽ മുണ്ടേരി പഞ്ചായത്ത് ഭരണസമിതി അംഗങ്ങളും ഉദ്യോഗസ്ഥരും സംയുക്തമായി സന്ദർശിച്ചു. സ്റ്റേഡിയം നിർമ്മാണവുമായി ബന്ധപ്പെട്ട പ്രാരംഭ നടപടികൾ വേഗത്തിലാക്കുന്നതിന്റെ ഭാഗമായാണ് ഉന്നതതല സംഘം സ്ഥലം പരിശോധിക്കാനെത്തിയത്.
സ്ഥലത്തിന്റെ ഭൂമിശാസ്ത്രപരമായ പ്രത്യേകതകൾ, റോഡ് സൗകര്യങ്ങൾ, വെള്ളക്കെട്ട് ഒഴിവാക്കാനുള്ള സാധ്യതകൾ തുടങ്ങിയ പ്രധാന കാര്യങ്ങൾ സംഘം വിലയിരുത്തി. സ്റ്റേഡിയത്തോട് അനുബന്ധിച്ച് ഫുട്ബോൾ ഗ്രൗണ്ട്, സിന്തറ്റിക് ട്രാക്ക്, ഇൻഡോർ സ്റ്റേഡിയം തുടങ്ങിയ ആധുനിക സൗകര്യങ്ങൾ ഉൾപ്പെടുത്തുന്നതിനുള്ള സാധ്യതകളും ചർച്ച ചെയ്തു. നാടിന്റെ കായിക രംഗത്ത് പുതിയൊരു കുതിച്ചുചാട്ടമാകും ഈ പദ്ധതിയെന്നും, സമയബന്ധിതമായി നിർമ്മാണ പ്രവർത്തനങ്ങൾ പൂർത്തിയാക്കാനുള്ള നടപടികൾ സ്വീകരിക്കുമെന്നും എം.എൽ.എ. വ്യക്തമാക്കി. സാങ്കേതിക തടസ്സങ്ങൾ എത്രയും പെട്ടെന്ന് നീക്കി പദ്ധതിയുടെ അടുത്ത ഘട്ടത്തിലേക്ക് കടക്കുമെന്നും അദ്ദേഹം അറിയിച്ചു.
പഞ്ചായത്ത് വൈസ് പ്രസിഡന്റ് വി.കെ. സനേഷ്, സ്റ്റാൻഡിങ് കമ്മിറ്റി ചെയർമാൻമാർ, പഞ്ചായത്ത് സെക്രട്ടറി മുഹമ്മദ് തസ്കീം, വാർഡ് മെമ്പർമാർ, പ്രാദേശിക കായിക സംഘാടകർ തുടങ്ങിയവരും, രാഷ്ട്രീയ പാർട്ടി നേതാക്കളായ ലക്ഷമണൻ തുണ്ടിക്കോത്ത്, സുധീഷ് മുണ്ടേരി, ലക്ഷ്മണൻ ടി.കെ., സി. രവീന്ദ്രൻ തുടങ്ങിയവരും സന്ദർശന വേളയിൽ എം.എൽ.എയോടൊപ്പമുണ്ടായിരുന്നു.
