കുറ്റ്യാട്ടൂർ: ജനകീയ പങ്കാളിത്തത്തോടെ കുറ്റ്യാട്ടൂർ ഗ്രാമപഞ്ചായത്ത് നടപ്പിലാക്കുന്ന 'കരുതൽ - വീട്ടിലേക്കൊരു ഓട്ടോ' പദ്ധതിയിൽ ഒമ്പതാമത്തെ റോഡിൻ്റെ കുറ്റിയടി കർമ്മം നടന്നു. പദ്ധതിയിലൂടെ 16-ാം വാർഡ് കൂപ്പയിലെ ഗ്രാമപഞ്ചായത്ത് ഹരിതകർമ്മ സേനാംഗം ഇന്ദിരയുടെ കുടുംബത്തിനാണ് സ്വന്തം വീട്ടിലേക്ക് ഒരു ചെറുവാഹനം എത്തുന്ന രീതിയിൽ വഴി സൗകര്യമൊരുങ്ങിയത്.
നാട്ടുകാരായ തച്ചുകുന്നുമ്മൽ കോമളവല്ലി, തണ്ടയൻ ഭാസ്‌കരൻ, പി.പി. സ്‌മിത എന്നിവർ സൗജന്യമായി വിട്ടുനൽകിയ ഭൂമിയിലാണ് റോഡ് നിർമ്മിക്കുന്നത്. തങ്ങളുടെ ഭൂമി വിട്ടുനൽകാൻ മനസ്സുകാട്ടിയ ഈ കുടുംബത്തെ കണ്ണൂർ ജില്ലാ പഞ്ചായത്ത് വൈസ് പ്രസിഡൻ്റ് ബി.ടി. ഷബ്ന പൊന്നാട അണിയിച്ച് ആദരിച്ചു.
ചടങ്ങിൽ കുറ്റ്യാട്ടൂർ ഗ്രാമപഞ്ചായത്ത് പ്രസിഡൻ്റ് നിജിലേഷ് പറമ്പൻ, വൈസ് പ്രസിഡൻ്റ് എം.വി. സുശീല, പഞ്ചായത്തംഗങ്ങളായ ടി. രാജൻ, കെ. അച്ചുതൻ, കെ.കെ. ഗോപാലൻ, പി. ശ്രീധരൻ, കെ.വി. പ്രതീഷ്, ഹരിതകർമ്മ സേനാംഗങ്ങൾ, പ്രദേശവാസികൾ എന്നിവർ പങ്കെടുത്തു.
'വീട്ടിലേക്കൊരു ഓട്ടോ' പദ്ധതിയുടെ ഒമ്പതാം ഘട്ടം പൂർത്തിയായതോടെ പഞ്ചായത്തിലെ 18 കുടുംബങ്ങൾക്കാണ് റോഡെന്ന പതിറ്റാണ്ടുകളുടെ സ്വപ്നം സഫലമായത്.
